म्याग्दीमा समुदाय स्तरमै देखियो कोरोना संक्रमण

मालिका गाउँपालिका, ५ देविस्थानकी ३५ बर्षिया एक महिलामा कोरोना संक्रमण पुष्टी भएको छ । म्याग्दीमा समुदाय स्तरमा कोरोना संक्रमण भएको यो पहिलो केस हो ।
गत असोज १५ गते उपचारकालागी पोखराका विभिन्न अस्पताल पुगेकी निजी महिलाको पोखराकै एक अस्पतालमा उपचारक्रममै स्वाव परिक्षण गर्दा कोरोना पुष्टी भएको हो । म्याग्दीमा हालसम्म विदेश/बाहिरबाट फर्केर क्वारेन्टाईनमा बसेका ब्यक्तिमा मात्र कोरोना संक्रमण देखिँदै आएकोको थियो ।
उनलाई हाल पोखरा स्थित स्वास्थ्य विज्ञान प्रतिष्ठानमा राखेर फोन कुराकानीका आधारमा सम्पर्कमा रहेका ब्यक्तिहरुको कन्ट्याक ट्रेसिङ सुरु गरिएको स्वास्थ्य कार्यालय बेनीका प्रमुख एकनारायण लम्सालले बताए ।
म्याग्दीमा हालसम्म ७ जनामहिला समेत ५७ जनामा कोरोना संक्रमण पुष्टी भएको छ । संक्रमति मध्य ५ जनाको उपचार भैरहेको छ । बाँकी उपचारपछि कोरोना संक्रमण मुक्त भै घर फर्केका छन ।
हालै अथुङ्गे स्थित सैनिक ब्यारेकमा कार्यरत दुई सैनिक र गाउँबाट उपचारक्रममा अस्पताल पुगेकी यी महिलामा कोरोना भेटिएसँगै जिल्लामा कन्ट्राक्ट ट्रेसिङको काम जटिल वन्न थालेको छ । संघारमा आएको दशैं लक्षितगरी बेनीका कपडा, कस्मेटिक, स्पोर्ट समेत प्राय: सवै पसलेहरु कोरोना संक्रमणको हटस्पट बनेको काठमाण्डौ पुगेर फर्केका छन । उनीहरु होम क्वारेन्टाईनमा समेत नबसी पसलमै बसेर ग्राहकहरुसँगै सम्पर्कमा रहेकाले समुदायमा संक्रमण फैलने जोखिम उच्च भएको छ ।
समुदायमा संक्रमण फैलिन नदिन स्थानिय प्रशासन र सरकारको निर्देशनको उल्लङ्घन गर्दै सरकारी अधिकारीहरु, जिल्लाका राजनैतिक दल, केही सामाजिक संस्था र आफुलाई समाजको उपल्लो बर्गको ठान्ने स्वघोषित अगुवाहरुले नै कोरोना संक्रमण रोकथामको सावधानीमा चरम लापरवार्ही गर्दै आएका छन । उनीहरुले कोरोना संक्रमणको हटस्पट मानिएका काठमाण्डौ समेत ठूला सहरमा जाने/फर्कने विषयलाई ठूलो उपलब्धीको रुपमा ब्याख्या गर्दै हिंड्ने गरेका छन ।
जिल्ला प्रशासन कार्यालय म्याग्दीले हालै एक विज्ञप्ती प्रकाशन गरी दशैं, तिहारजस्ता चाडपर्व नेपाली समाजको सभ्यता, संस्कृति र सद्भाव साट्ने पर्व भएपनि यो वर्ष कोरोना संक्रमणको जोखिम अधिक रहेकोले जो जहाँ छ त्यहीं बसेर मनाउन आग्रह गर्दै, जनस्वास्थ्य मापदण्ड पूर्णपरिपालना, सामाजिक दुरी कायमगरी जमघट, भिडभाड नगर्न आग्रह गरेको छ ।
‘यो कोरोना भाईरस संक्रमणबाट उत्पन्न स्वास्थ्य महाविपदले निम्त्याएको असामान्य अवस्थामा सवै संयमित हुनै पर्ने छ । बाँचे अर्को वर्ष चाडपर्व मनाउँला जनस्वास्थ्य मापदण्ड सवैले पालना गरौं’ प्रमुख जिल्ला अधिकारी उमाकान्त अधिकारीेले भने, ‘कोरोना संक्रमण समुदायस्तरमा देखिन थालेकोले थप सतर्कता अपनाउनै पर्ने भएको छ ।’