कोरोना संक्रमणमा नेपालले चीन र जापानलाई उछिन्यो

कोरोना संक्रमणमा नेपालले आजबाट चीन र जापानलाई उछिनेको छ । नेपालमा आज २ हजार २५३ नयाँ संक्रमित थपिई ४४ औँ स्थानमा उक्लिएको छ । चीनमा आज १६ मात्रै थपिएका छन् भने जापानको नयाँ संक्रमण देखिएको छैन् ।

अहिले सम्म नेपालमा ८६ हजार ८२३ जनामा कोरोना पुष्टि भएको छ । नेपालभन्दा एकस्थान मुनि परेको चीनमा ८५ हजार ४५० जना र नेपाल भन्दा दुई स्थान तल रहेको जापानमा ८४७६८ जनामा कोरोना संक्रमण भएको पाइएको छ । तर यी दुई मुलुकमा कोरोनाबाट मृत्यु हुने संख्या भने नेपालको भन्दा बढी छ । चीनमा अहिलेसम्म ४ हजार ६३४ जनाले कोरोनाबाट ज्यान गुमाएका छन् । जापानमा कोरोनाबाट १ हजार ५९० जनाको ज्यान गएको छ ।

नौ महिना अघि अर्थात ३१ डिसेम्वर २०१९ को दिन पहिलो पटक चीनको वुहानमा शहरमा पहिलो पटक नयाँ कोरोना भाइरस (कोभिड – १९) देखिएको थियो ।

नेपालमा चीनमा देखिएके २५ दिन पछि अर्थात २४ जनवरी २०२० (१० माघ २०७६)का दिन चीनको वुहानवाटै आएका एक युवकमा भाइरस भेटिएको थियो । तर त्यसपछिको अढाई महिना नेपालले भाइरसमाथी पुरा रुपमा नियन्त्रण राख्न सफल भयो ।

दोस्रो संक्रमण ९ चैतमा देखा परेको थियो ।

नेपालमा संक्रमण दर दुई अंकमा पुग्न तीनमहिना लागेको थियो तर पछिल्लो समय नेपालको संक्रमण दिनहुँ ४ अंकका दरले बढ्न थालेको छ । यसले नेपालको अवस्था थप जटिल मोड तर्फ गएको संकेत गरेको छ । विज्ञहरुले जनस्वास्थ्यको मापदण्ड अपनाउन नसक्दा संक्रमण दर बढेको बताउँछन् ।

नौ महिना अघि चीनको वुहानमा देखिएको यो भाइरसको महामारी अहिले विश्वका २१६ वटा मुलुकमा फैलिएको छ । संसारभर तीन करोड ५१ लाख बढी मानिस संक्रमणमा परेका छन् । यसैको संक्रमणबाट १० लाख ३८ हजार बढीले ज्यान गुमाईसकेका छन् ।