पुनहिल संवाददाता
अन्नपूर्ण गाउँपालिका, ३ दानामा पर्ने संसारको सर्वाधिक गहिरो अन्ध गल्छिमा अवस्थित रुप्से झरनामा आएको बाढीले सडक बगाएपछि बेनी–जोमसोम सडकमा पैदल यात्रा समेत यातायात अवरुद्ध भएको छ ।
त्यस्तै सदरमुकाम बेनीदेखी ११ किमी उत्तर बेनी–जोमसोम सडकमा पर्ने रघुगंगा गाउँपालिका, १ बेगखोलामा बाढी आउँदा यातायात तथा पैदल यात्रा पूर्ण अवरुद्ध भएको छ । बाढी आउँदा सवारी संञ्चालन गर्न स्ट्याण्ड वाई राखिएको डोजरले बकेटमा राखेर यात्रु वार–पार गराउने गरेको छ ।
यातायात अवरुद्ध भएपछि मुस्ताङबाट आलु, स्याउ बोकेर झरेका र तल बेनीहुँदै खाद्यान्न समेत निर्माण सामाग्री बोकेर आएका सयौं सवारी साधन वारीपारी रोकिएका छन ।
माथिल्लो जलाधारमा भारीबर्षापछि पहिरो गएकोले रुप्से झरनामा गेग्रानसहित लेदोको बाढी आएपछि फेदीको सडक कटान गरेको हो । मंगलवार विहानैदेखी रुप्सेमा पानीको सतहबढेपछि अवरुद यातायात सडक नै बगेपछि बुधवारदेखी पूर्णरुपमा अवरुद्ध भएको छ । रुप्सेको बाढीले वल्लो–पल्लो भित्तो पुरै झारेर बगाएपछि नयाँ ट्याक खोल्न समस्या भएको हो ।
साउन २६ गतेको बाढीले एक महिनासम्म अवरुद्ध सडक रुप्से झरनामा नयाँ ट्याक खोलेर भदौ १ गतेदेखी यातायात संञ्चालन गरिएको थियो । भदौ ३० गतेदेखीको बाढीले ट्याक समेत बगाएपछि पुन: यातायात तथा पैदल यात्रा अवरुद्ध भएको छ ।
‘मंगलवार रुप्सेमा पानीको सतह केही घटेसँगै पानी फिँजारी नयाँ ट्याक खोलेर सवारी पास गराउने प्रयास असफल भयो । रातीको बाढी उर्लेर आएपछि वारीपारीको भित्ता समेत बगाएपछि भर्खर सडक खुल्ने संभावना नै रहेको छैन’ सडकका स्थानिय सुपरभाईजर इन्द्रसिं शेरचनले भने, ‘रुप्सेमा पानीको सतह नघटी भर्खर ट्याक खोल्न समस्या छ ।’
चार बर्ष अघि ०७३ भदौ १२ गते बेगखोलामा आएको बाढीले वस्तीसमेत त्यहाँको बेलिव्रिज बगाएपछि बर्षेनी बर्खायाममा बेगखोलामा पैदल यात्रुलाई खोला तर्न समस्या आउने गरेको छ । सवारी साधनपनि खोलामा पानीको सतह घट्दा जर्वजस्ती तार्ने र पानी बढ्दा यातायात अवरुद्ध हुने गरेको छ ।
सडक विभागले बेगखोलामाथी बन्ने मोटरपुलको डिजाईन टुङ्गो लगाउन सकेको छैन । बाडीले खोलाको स्पान बढाएको र वारम्बार धार परिवर्तन गरिरहने भएकोले कस्तो डिजाईनको पुल बनाउने चार बर्षसम्म टुङ्गो लगाउन नसकेको हो ।
