अनलाइन कक्षामा सहभागी हुन त्रिविको अनुरोध

१० भाद्र २०७७, बुधबार १८:१२ मा प्रकाशित (1 महिना अघि)
पुनहिल संवाददाता
कोरोना भाइरस प्रभावका कारण अध्ययन–अध्यापन कार्यमा असर परेपछि त्रिभुवन विश्वविद्यालयले विद्यार्थीलाई पठनपाठनका लागि सहभागी हुन आग्रह गरेको छ ।
त्रिविका शिक्षाध्यक्ष प्राडा शिवलाल भुसालले तत्कालका लागि कक्षाकोठामा गई पठनपाठन गर्न सम्भव नहुँदा भर्चुअल माध्यमबाट पढाइ भइरहेकाले विद्यार्थीले आ–आफ्नो अध्ययनरत विभाग/स्कूल/क्याम्पसमा सम्पर्क राखी पठनपाठनमा सहभागी हुन आग्रह गरेका हुन् ।
गत चैत्रको तेस्रो सातादेखि नै पठनपाठनको वैकल्पिक विधिबाट कक्षाहरू सञ्चालन गर्न आफ्ना सबै शिक्षक, कर्मचारी तथा अध्ययनरत विद्यार्थीहरूको इमेलको ठेगाना बनाई अनलाइन विधिबाट पठनपाठन सञ्चालन गरिरहेको भन्दै उनले हालसम्म पनि कतिपय विद्यार्थीहरू आफू अध्ययनरत विभाग तथा क्याम्पसको सम्पर्कमा नआएकोले पठनपाठन तथा स्थगन गरिएको परीक्षा व्यवस्थापन गर्न समस्या भएको बताएका छन् । त्यसैले उनले चाँडोभन्दा चाँडो विद्यार्थीलाई पठनपाठनमा सहभागी हुन आग्रह गरेका हुन् ।
त्रिविका सम्पूर्ण विभाग, स्कूल, क्याम्पस प्रशासन, डीन कार्यालय समेतलाई विद्यार्थीलाई सम्पर्कमा ल्याउने कार्यमा तदारुकता साथ लागिपर्न र विद्यार्थीलाई सम्पर्कका लागि सहज वातावरण मिलाउनसमेत उनले अनुरोध गरेका छन् ।