शनिबार थपिए ४६८ जना, संक्रमितको संख्या २६ हजार नाघ्यो

नेपालमा पछिल्लो २४ घण्टामा ४ सय ६८ जना कोरोनाका नयाँ संक्रमित थपिएका छन् । देशभरका ३९ प्रयोगशालामा ११ हजार ४७ जनाको पीसीआर गर्दा उक्त संख्याका संक्रमित भेटिएको हो । योसँगै हालसम्म कोरोना संक्रमितको कुल संख्या २६ हजार १९ जना पुगेको छ ।

देशभर हाल विभिन्न जिल्लाका क्वारेन्टाइनहरुमा १४ हजार ४ सय ४८ जना रहेका छन् । पछिल्लो समय काठमाडौं उपत्यकामा कोरोना संक्रमण बढ्ने क्रम शनिबार पनि कायमै रह्यो । काठमाडौं उपत्यकामा शनिबारमात्रै ९८ जना कोरोना भाइरसका संक्रमित थपिएका छन्। जसअनुसार काठमाडौं जिल्लामा ८०, ललितपुरमा ९ र भक्तपुरमा ९ जनामा कोरोना संक्रमण पुष्टि भएको मन्त्रालयका प्रवक्ता डा. गौतमले  बताए ।

पछिल्लो २४ घण्टामा १ सय २४ जना कोरोना उपचारपछि घर फर्कन फर्केका छन । योसँगै नेपाल कोरोना संक्रमणपछि सफल उपचार गरेर घर फर्कनेको संख्या १७ हजार २ सय १ जना पुगेको छ । यो भनेको कुल संक्रमितको ६६.१ प्रतिशतलाई निको भएको हो ।

कोरोना भाइरस संक्रमणका कारण शनिबार पनि ३ जनाको दुखद निधन भएको मन्त्रालयले घोषणा गरेको छ । उहाँहरुमध्ये कपिलवस्तुका १ जना पुरुष, पर्साका १ जना पुरुष र धनुषामा पनि १ जना पुरुषको दुःखद निधन भएको छ ।

कपिलवस्तु जिल्ला मायादेवी गाउँपालिका वडा नं. १ निवासी ४० वर्षीय पुरुषको कोरोना भाइरस संक्रमणका कारण निधन भएको हो । उहाँको लुम्बिनी प्रादेशिक अस्पताल बुटवलमा उपचारका क्रममा साउन ३१ गते निधन भएको छ । यसैगरी पर्सा जिल्ला वीरगन्ज महानगरपालिका वडा नं. १२ वस्ने ६० वर्षीय एक पुरुषको पनि कोरोनाकै कारण मृत्यु भएको छ ।
धनुषा जिल्ला जनकनन्दनी गाउँपालिकाका ५० वर्षीय पुरुषको पनि साउन २९ गते कोरोना भाइरस संक्रमणका कारण दुखद निधन भएको छ । योसहित कोरोना संक्रमणका कारण नेपालमा मृत्यु हुनेहरुको संख्या अब नेपाल १०२ पुगेको छ । जसमा २२ जना महिला र ८० जना पुरुषको निधन भएको हो ।

केही दिनअघि मात्रै कोरोना मुक्त हुने जिल्लाको संख्या बढिरहेको थियो । तर अहिले ७७ मध्ये जम्मा ५ जिल्लामा मात्र कोरोना संक्रमण मुक्त भएको मन्त्रालयका प्रवक्ता डा. गौतमले जानकारी दिनुभयो । उहाँका अनुसार अहिले संखुवासभा, मनाङ, मुस्ताङ, डोल्पा र हुम्लामा कोरोना भाइरसबाट संक्रमित कोही पनि भेटिएको छैन ।