अन्नपूर्णले बाढीपहिरो विस्थापितकालाई हेलिकोप्टरमा पुर्‍यायो राहत

११ श्रावण २०७७, आईतवार ०६:३८ मा प्रकाशित (2 महिना अघि)
पुनहिल संवाददाता

अन्नपूर्ण गाउँपालिकाले हालै आएको बाढीपहिरोले घरमा क्षति पुगेपछि विस्थापित ३ र ४ वडाका ३८ घर परिवारकाकालागी हेलिकोप्टरमा राहत पुर्‍याएको छ ।
प्रमुख प्रशासकीय अधिकृत नविन सुवेदीका अनुसार अन्नपूर्ण गापा, ३ दानाको काप्रे, तितर, द्धारी र ४ नम्बर वडाको कोप्चेपानी, गाडपार र घरापमा बाढीपहिरो विस्थापितकालागी ५० बोरा चामल, १० प्याक तेल, केही दाल र प्रशासन कार्यालयबाट प्राप्त १५ थान त्रिपाल हेलिकोप्टरबाट लगिएको हो ।
‘सडक मार्ग पुरै अवस्द्ध छ । पैदल हिंड्नपनि गाहे छ । सडक खुल्ने कहिले हो कहिले उता जनता भोकै छन, त्यसैले राहतको मुल्यभन्दा धेरै महंगो ढुवानी खर्चगरी राहत सामाग्री पुर्‍याउन लागेका हौं’ अन्नपूर्ण गाउँपालिका प्रमुख डमबहादुर पुनले भने, ‘गाउँपालिका र स्थानीय रेडक्रसमा उपलब्ध त्रिपाल, कम्बल समेतका राहत केही दिन अघि नै पुर्‍याएका हौं ।’
साउन महिनालागेयता अन्नपूर्ण गाउँपालिकाको कोप्चेपानीमा ३ घरपरिवार, काप्रेमा २२ घरपरिवार, तितरमा २ घर, द्धारीमा २ घर, गाडपारमा ५ घर, घरापमा ४ घर, तातोपानीमा १४ घर र दोसल्लेमा १० घरपरिवार पहिरोबाट घर क्षित भएर तथा अति जोखिम भएकोले विस्थापित भएका छन ।