लकडाउन खुलेकै दिन १ सय संक्रमित

नेपालमा गएको २४ घण्टामा एक सय जनामा कोरोना संक्रमण पुष्टि भएको छ । लकडाउन खुलेकै दिन एक सय जनामा कोरोना संक्रमण पुष्टि भएको हो ।
स्वास्थ्य तथा जनसंख्या मन्त्रालयका अनुसार पछिल्लो समय ३ हजार ७ सय ७९ जनाको पीसीआर परीक्षण भएको थियो।
यस्तै, पछिल्लो समय २ सय ७ जना निको भइ घर फर्केका छन् । योसँगै कोरोना मुक्त हुनेको संख्या १२ हजार ६ सय ८४ पुगेको छ । नेपालमा हालसम्म १८ हजार ९४ जना संक्रमित भएका छन् । तीमध्ये ४२ जनाको मृत्यु भएको छ।
नेपालमा कोरोना भाइरस (कोभिड–१९) बाट पछिल्लो समय २ जनाको मृत्यु भएको छ । तीमध्ये एक विदेशी छन् । नेपालमै कोभिड–१९ का कारण विदेशी नागरिकको मृत्यु भएको पहिलो घटना हो । ४८ वर्षीया एक चिनियाँ महिला सहित जनकपुर बस्ने ६० वर्षीय पुरुषको मृत्यु भएको जनाएको हो । मृत्यु हुने चिनियाँ महिला पोखरामा बस्दै आएकी थिइन् ।
मणिपाल अस्पतालमा भर्ना भएकी उनलाई स्वास्थ्यमा थप समस्या देखिएपछि साउन २ गते हेलिकोप्टरमार्फत काठमाडौंको ग्रान्डी अस्पताल ल्याइएको थियो । परीक्षणका क्रममा कोरोना पुष्टि भएपछि उनलाई फेरि शिक्षण अस्पताल महाराजगञ्जमा लगी उपचार गरिएकोमा बुधबारमात्र मृत्यु भएको हो ।
त्यस्तै, कोरोनाका कारण जनकपुर घर भएका ६० वर्षीय पुरुषको पनि मृत्यु भएको छ । खोकी, उच्च ज्वरो र स्वासप्रश्वासमा समस्या भएर धरानस्थित बीपी कोइराला अस्पतालमा उनलाई भर्ना गरिएको थियो । सो क्रममा उनको नमुना परीक्षण गर्दा कोरोना पुष्टि भएको थियो ।