कोरोना जितेर एकैदिन १७ सय ५ जना घर फर्के, १० हजार २९४ जना डिस्चार्ज

कोरोना संक्रमणलाई पराजित गरी सोमबार १ हजार ७ सय ५ जना सफल उपचारपछि घर फर्किएा छन् । यो संख्या एकै दिन घर फर्कनेहरुमा सबैभन्दा बढी हो ।
मुलुकका विभिन्न जिल्लास्थित आइसोलेसन सेन्टरमा उपचार गराइरहनु भएका संक्रमितमध्ये सोमबार ठूलो संख्यामा कोरोना युद्ध जितेर घर फर्कनु भएको हो । कोरोना सफल उपचारपछि घर फर्कनेको संख्या अब १० हजार २ सय ९४ पुगेको छ । यो भनेको कुल संक्रमितको ६०.७ प्रतिशत हो ।
कोरोना भाइरस संक्रमितको संख्या बढ्ने क्रम सोमबार पनि कायम रहेको छ । स्वास्थ्य तथा जनसंख्या मन्त्रालयको नियमित प्रेस ब्रिफिङमा दिइएको जानकारीअनुसार मुलुकका विभिन्न २५ प्रयोगशालामा गरिएको ५ हजार ८ सय ५६ पीसीआर परीक्षणमा १ सय ४४ जनामा कोरोना भाइरस पोजेटिभ देखिएको हो ।
मन्त्रालयका प्रवक्ता डा. जागेश्वर गौतमका अनुसार मुलुकभरका प्रयोगशालामा पछिल्लो २४ घन्टाभित्रको परीक्षण रिपोर्टसँगै अब नेपालमा कोरोना संक्रमितको संख्या १६ हजार ९ सय ४५ जना पुगेको छ ।
काठमाडौं उपत्यकामा सोमबार पनि केही व्यक्तिमा कोरोना भाइरसको संक्रमण भेटिएको छ । मन्त्रालयका अनुसार काठमाडौंमा ३ जना र ललितपुरमा ५ गरी ८ जनाको प्रयोगशाला परीक्षणमा कोभिड–१९ को संक्रमण पुष्टि भएको छ । जसअनुसार टेकूस्थित केन्द्रीय प्रयोगशालामा २, त्रिवि शिक्षण अस्पताल महाराजगन्ज प्रयोगशाला परीक्षणमा १ र ललितपुरको पाटन अस्पतालको प्रयोगलाशामा ललितपुरका ५ जनामा संक्रमण देखिएको हो ।
कोरोना भाइरस संक्रमणका कारण सोमबार कसैको पनि मृत्यु भएको छैन । आजसम्म ३८ जनाको कोरोना संक्रमणपछि मृत्यु भएको छ ।
मुलुकमा ७७ जिल्लामध्ये ६ जिल्लामा यतिबेला कोरोनाका कुनै पनि संक्रमण देखिएको छ । धनकुटा, भोजपुर, सोलुखुम्बु, मुस्ताङ, मनाङ, हुम्लामा अब कुनै पनि संक्रमित छैनन् ।