कोरना भेटिएपछि मुस्ताङको तिब्बती शरणार्थी क्याम्प सील

७ असार २०७७, आईतवार ११:२८ मा प्रकाशित (3 महिना अघि)
पुनहिल संवाददाता

हिमालपारीको जिल्ला मुस्ताङ्गमा शनिवार एक बृद्ध तिब्बती शरणार्थीमा कोरना संक्रमण पुष्टी भएपछि कन्ट्याक ट्रेसिङ गर्न घरपझोङ गाउँपालिका, १ छैरो तिब्बती शरणार्थी क्याम्प सील गरिएको छ ।
हिउँदमा जाडो छल्न झरेका ८३ बर्षिय बृद्ध समेत छैरो क्याम्पका २० जना शरणार्थीको टोली लकडाउनले काठमाण्डौ रोकिएकोमा खुकुलो भएपछि जेठ ३१ गते मुस्ताङ्ग प्रवेश गरेका थिए । मुस्ताङ प्रवेश गर्नेक्रममा आरडिटी परिक्षण गर्दा बृद्धमा पोजेटिभ देखिएपछि जोमसोम स्थित आईसोलेसनमा राखिएको थियो ।
सुगर तथा प्रेसरका विरामी समेत रहेका बृद्धलाई क्वारेन्टाईनमा नराखी आईसोलेसनमा राखिएको कोरना भाईरस संक्रमण प्रकोप कन्ट्रोल कमाण्ड पोष्ट मुस्ताङले जनाएको छ । पोष्टका अनुसार बृद्ध र उनका सुसारे बसेका ज्वाई समेत दुई जनाको २ गते स्वाब संकलन गरी पठाईएको र पोखरामा पिसिआर गर्दा बृद्धमा कोरना संक्रमण पुष्टी भएको हो । उनका सुसारे बसेका ज्वाईको पिसिआर रिपोर्ट भने नेगेटिभ छ ।
जिल्ला प्रशासन कार्यालय मुस्ताङका अनुसार घरपझोङ गापा, १ छैरो तिब्बती शरणार्थी क्याम्पमा १ सय ६० जना बस्दै आएकोमा लकडाउनले केही पोखरा, काठमाण्डौ मै अड्केकोले हाल क्याम्पमा ९० जना रहेका छन । यी मध्य कोरना संक्रमित बृद्ध, उनकी छोरी, ज्वाई समेत २० जना जेठ ३१ गते मात्र मुस्ताङ आएर क्याम्प बसेका हुन ।
‘तिब्बती शरणार्थी क्याम्प सीलगरी कन्ट्याक ट्रेसिङ सुरु गरेका छौं । कन्ट्याक ट्रेसिङपछि उनीहरुको स्वाब संकलन गरी पिसिआर टेष्ट गर्ने तयारीमा छौं’ प्रमुख जिल्ला अधिकारी वेदप्रसाद अर्यालले भने, ‘संक्रमितको स्वास्थ्य अवस्था सामान्य छ ।’