एकै दिन सबैभन्दा धेरै ११४ कोरोना संक्रमित, नेपालमा ८८६ जनामा संक्रमण पुष्टि

नेपालमा अहिलेसम्मकै एकै दिन सबैभन्दा बढी कोरोना भाइरस संक्रमित बुधबारमात्रै १ सय १४ जनामा देखिएको छ । हिजो मंगलबार पनि ९० जना थपिएका थिए । अब नेपालमा कोरोना भाइरस पुष्टि भएकाको संख्या ८८६ पुगेको स्वास्थ्य तथा जनसंख्या मन्त्रालयको नियमित पत्रकार सम्मेलनमा जानकारी दिइएको छ ।
मन्त्रालयका प्रवक्ता डा. विकास देवकोटाका अनुसार कोशी अस्पतालमा गरिएको परीक्षणमा झापाका १७ जना, धरानमा गरिएको परीक्षणमा ११ जना, सप्तरीका ३ जना, हेटौंडाको प्रयोगशालामा गरिएको परीक्षणमा आठ जनामा बुधबार कोरोना भाइरस पोजेटिभ देखिएको छ ।
त्यस्तै, पोखराको प्रादेशिक प्रयोगशालामा बागलुङका ६ जना, दाङमा गरिएको परीक्षणमा १८ जना, काठमाडौंको केन्द्रीय प्रयोगशालामा गरिएको परीक्षणमा ३८ जनामा संक्रमण पोजेटिभ देखिएको छ ।
योसँगै अहिलेसम्म सबैभन्दा बढी सङ्क्रमित प्रदेश ५ का छन् । सो प्रदेशका नौ जिल्लामा ३६५ जनामा सङ्क्रण पुष्टि भएको छ । सबैभन्दा कम सुदूरपश्चिम प्रदेशका पाँच जिल्लामा १७ जना सङ्क्रमित फेला परेको स्वास्थ्य मन्त्रालयले जनाएको छ ।
यसैगरी प्रदेश १ का सात जिल्लामा १०३, प्रदेश २ का आठ जिल्लामा ३२४, वाग्मती प्रदेशका ११ जिल्लामा ३९, गण्डकी प्रदेशको चार जिल्लामा १३ र कर्णाली प्रदेशको तीन जिल्लामा २५ सङ्क्रमित फेला परेका छन् । यससँगै कोरोना सङ्क्रमित फेला परेको जिल्ला ४७ पुगेको छ ।