आज:  | Sat, 02, Jul, 2022

उदयपुर थप ८ जनाको कोभिड-१९ रिपोर्ट पोजिटिभ, भेरिफाइ हुँदै

९ बैशाख २०७७, मंगलवार १४:०२ मा प्रकाशित (2 बर्ष अघि)
पुनहिल संवाददाता
उदयपुरको त्रियुगा नगरपालिका-३ भुल्केबस्तीका थप आठ जनाको विराटनगर प्रयोगशालामा गरिएको कोभिड-१९ परीक्षण नतिजा पोजिटिभ देखिएको छ।एकैपटक १३ जना संक्रमित देखिएको उदयपुर त्रियुगा नगरपालिका-३ भुल्केबस्तीको मस्जिद वरपरका उनीहरूको थ्रोट स्वाब नमूना परीक्षणको क्रममा पोजिटिभ आएपछि धरानस्थित बिपी कोइराला स्वास्थ्य विज्ञान प्रयोगशालामा पुन: जाँच गर्न लागिएको छ।६ गते नमूना संकलन गरिएका ६९ जनाको परीक्षण गर्दा कोशी अंचल अस्पतालको ल्यावमा आठजनाको नतिजा पोजिटिभ आएको प्रदेश १ का कोभिड-१९ सूचना केन्द्र एवं मोरङ जनस्वास्थ्य कार्यालयका प्रमुख ज्ञानबहादुर बस्नेतले बताए।“भेरिफाइ रिजल्ट नआएसम्म यकिन गर्ने कुरा आउँदैन। हामीले आठजनालाई विराटनगर ल्याएर आइसोलेसनमा राखेका छौं। उहाँहरूको स्वास्थ्य सामान्य छ”, बस्‍नेतले जानकारी दिए।त्यहाँका ६९ घरका एक/एक जनाको नमूना संकलन गरेर विराटनगर लगिएको थियो। त्रियुगा नगरपालिका-३ भुल्केका वडा अध्यक्ष अवधेशकुमार चौधरीका अनुसार उनीहरू आठैजनालाई आज बिहानै एम्बुलेन्समा हालेर विराटनगर लगिएको छ।कोभिड-१९ का बिरामी भेटिएपछि सिल गरिएको भुल्केबस्ती र आसपासको क्षेत्रमा दुई दिनअघिबाट नेपाली सेनाको चिकित्सक टोलीले थ्रोट स्वाब नमूना संकलन गरिरहेको छ।