आज:  | Sat, 02, Jul, 2022

डब्लुएचओलाई दिँदै आएको सहयोग रोक्न ट्रम्पको निर्देशन

३ बैशाख २०७७, बुधबार ०८:४० मा प्रकाशित (2 बर्ष अघि)
पुनहिल संवाददाता
अमेरिकाले विश्व स्वास्थ्य संगठन (डब्लुएचओ) लाई दिँदै आएको आर्थिक सहयोग रोक्ने भएको छ ।अमेरिकी राष्ट्रपति डोनाल्ड ट्रम्पले कोरोना भाइरसको महामारी फैलनबाट रोक्न डब्लुएचओले आधारभूत कर्तव्य पनि पूरा गर्न नसकेको आरोप लगाउँदै दिँदै आएको सहयोग रोक्न निर्देशन दिनु भएको हो ।चीनबाट जति बेला कोरोना भाइरस फैलन सुरु भएको थियो त्यसैबेलादेखि संयुक्त राष्ट्रको यो संगठन त्यसलाई व्यवस्थापन गर्न असफल भएको र वास्तविक तस्बिरलाई लुकाउँदै आएको ट्रम्पले आरोप लगाउनु भएको छ ।उहाँले यसका लागि डब्लुएचओलाई जवाफदेही बनाउनुपर्ने बताउनु भएको छ । डब्लुएचओको काम र कर्तव्यमा प्रश्न उठाइरहेका ट्रम्पलाई देशभित्रै कोरोना संक्रमणको रोकथाममा गम्भीर नरहेको आरोप लाग्दै आएको छ।‘मैले मेरो प्रशासनलाई आर्थिक सहायता रोक्ने निर्देशन दिएको छु । विश्व स्वास्थ्य संगठनले गरेको कोरोना भाइरस संक्रमणको ढाकछेप र नराम्रो व्यवस्थापनको समीक्षा गरिनेछ’, ह्वाइट हाउसमा आयोजित पत्रकार सम्मेलनमा ट्रम्पले भन्नुभयो । ‘डब्लुएचओ आफ्नो आधारभूत जिम्मेवारी बहन गर्न असफल भएको छ र यसका लागि उसलाई जवाफदेही बनाउनुपर्छ’, उहाँले थप्नु भयो ।अमेरिका डब्लुएचओको सबैभन्दा ठूलो आर्थिक दाता हो । गत वर्ष अमेरिकाले उसलाई ४ सय मिलियन अमेरिकी डलर सहायता दिएको थियो । यो रकम डब्लुएचओको कुल बजेटको १५ प्रतिशत हो ।हाल अमेरिका विश्वमा कोरोना भाइरसको संक्रमणबाट सर्वाधिक प्रभावित देश बनेको छ । त्यहाँ हालसम्म कोरोनाका कारण २५ हजार बढीको मृत्यु भइसकेको छ भने झण्डै ६ लाख मानिस संक्रमित भइसकेका छन्। एजेन्सी ।