काठमाडौं। नेपालमा थप तीनजनामा कोरोना भाइरसको संक्रमण भेटिएको छ।स्वास्थ्य मन्त्रालयले आफ्नो फेसबुक पेजमा केही बेरअघि सार्वजनिक गरेको विवरण अनुसार मुम्बइबाट फर्किएका कैलालीका २१ वर्षीय पुरूष, उत्तराखण्डबाट फर्किएका कञ्चनपुरका ४१ वर्षीय पुरूष र कैलालीकी ३४ वर्षीया महिलामा कोभिड-१९ देखिएको हो।स्वास्थ्यमन्त्री भानुभक्त ढकालले पनि आफ्नो फेसबुक पेजमा तीनजना नयाँ संक्रमित भेटिएको पुष्टि गरेका छन्। कैलालीकी महिला भने कैलालीमा संक्रमित भेटिएका पुरूषको आफन्त भएको मन्त्रालयले जनाएको छ।यसअघि बाहिरबाट आएकामा कोभिड-१९ पोजेटिभ देखिएकोमा आज भेटिएको संक्रमितसँगै पहिलो पटक नेपालभित्रै रहेको व्यक्तिमा कोरोना भाइरस संक्रमण पुष्टि भएको स्वास्थ्य मन्त्रालयले भनेको छ। यी तीनजनामा कोभिड-१९ देखिएसँगै नेपालमा कोरोना भाइरस पोजेटिभका बिरामी नौ जना भएका छन्।