कोभिड–१९ त्रासमा पनि दादुरा–रुवेला खोप संञ्चालन गरिने

८ चैत्र २०७६, शनिबार १६:०८ मा प्रकाशित (11 महिना अघि)
पुनहिल संवाददाता

जिल्ला स्वास्थ्य कार्यालय म्याग्दीले आगामी चैत १०–१८ र २१–२९ गतेसम्म दुई चरणमा संञ्चालन गरिने दादुरा–रुवेला खोप अभियान यथावत संञ्चालन गर्ने भएको छ ।

सरकारले संघ, प्रदेश र स्थानीय तहका सार्वजनिक, सामुदायीक तथा निजी सेवा प्रदायकले अत्यावशेक सेवा बाहेकका सेवा वन्द गर्ने निर्णय गरेको भएपनि दादुरा–रुवेला विरुद्धको खोप संञ्चालन गरिने भएको हो । स्वास्थ्य कार्यालयले चैत १०–१९ गतेसम्म धौलागिरी, मालिका र मंगला गाउँपालिका तथा चैत २१–२९ गतेसम्म बेनी नगरपालिका समेत रघुगंगा र अन्नपूर्ण गाउँपालिकाका ९ महिनादेखी ५ बर्ष उमेर सम्मका ९ हजार ३ सय ५२ जना बालबालिकालाई दादुरा–रुवेला खोप संञ्चालन गर्न लागेको हो । जिल्लाका ३ सय ६५ वटा खोप केन्द्रमा ७ सय ४० जना स्वयंम सेवक र २ सयबढी स्वास्थ्यकर्मी परिचालित भै खोप संञ्चालन गरिने छ ।

खोप कार्यक्रम गर्दा कुनै भीडभाड नहुने र वस्ती–वस्ती तहमा पुगेर हरेक वालवालिकालाई एक्ला एक्लै राखेर सुरक्षित खोप संञ्चालन गरिने भएकोले कोरना भाईरस (कोभिड–१९) संक्रमणको संभावना नरहने श्वास्थ्य कार्यालयले शनिवार संञ्चारकर्मीसँग अर्न्तक्रिया गरी जानकारी गराएको छ ।

‘कोरना भाईरस संक्रमणबाट बच्ने उपायहरुको पूर्णपरिपालना गर्दै एक पटकमा एक जना बालबालिकालाई मात्र खोप लगाउने गरी अभियान सञ्चालन गर्छौ । पहाडमा पातलो वस्ती रहेकोले कोरना भाईरसको त्रास विचपनि दादुरा–रुवेला खोप लगाउन अभिभावक आउने विश्वास गरेका छौं’ स्वास्थ्य कार्यालय प्रमुख एकनारायण लम्सालले भने, ‘यत्रो राष्ट्रिय/अर्न्तराष्ट्रिय स्वास्थ्य संकटकालको वेला चलाईने भएकोले खोप अभियानमा कोरना भाईरस संक्रमण नहुने गरी सुरक्षा अपनाएका छौं ।’

बालबालिकामा हुने अन्धोपन, झाडापखला, कान पाक्ने, न्युमोनिया, एसेल्फाईटिस जस्ता संक्रमण र रोगबाट बचाउन दादुरा–रुवेला खोप अति जरुरी छ । सरकार दादुरा–रुवेला रोग सँधैकालागी निवारण गर्ने अभियानको अन्तिम अवस्थामा रहेकोले कोभ–१९ को त्रास र संकटवीच खोप यथावत राखिएको हो ।