हिमालपारीका विद्यालय खुले

१३ फाल्गुन २०७६, मंगलवार १५:५७ मा प्रकाशित (1 महिना अघि)
पुनहिल संवाददाता

हिमालपारीको जिल्ला मुस्ताङ्गमा नयाँ शैक्षिक सत्र सुरु भएको छ । शैक्षिक सत्र सुरु भएसँगै विद्यालय खुलेपनि बाक्लो हिमपातले गर्दा अझै सवै विद्यालयमा विद्यार्थी भने पुगेका छैनन ।
मुस्ताङ्गसमेत हिमाली जिल्लामा मंसिर मसान्तमा शैक्षिक सत्र समाप्त भै पुस–माघ जाडो विदा गरी फागुन १ गतेदेखी सत्र सुरु हुन्छ ।
मुस्ताङ्गको तल्लो क्षेत्रमा पर्ने थासाङ, घरपझोङ र मध्य क्षेत्रमा पर्ने बाहृगाउँ–मुक्तिक्षेत्र गरी ३ गाउँपालिकाका भित्रका विद्यालय नयाँ सैक्षिक सत्रसँगै पढाई सुचारु भएको छ । तर बाक्लो हिउँ नपग्लेको कारण उपल्लो मुस्ताङमा पर्ने लोघेकर–दामोदर कुण्ड र लोमन्थाङ गाउँपालिकामा रहेका २० वटा विद्यालय भने चैतबाट मात्र खुल्ने शिक्षा विकास तथा समवन्यय इकाइ मुस्ताङ्गले जनाएको छ ।
समवन्यय इकाईका अनुसार यी विद्यालयले पुस–माघको हिउँदे विदामा समेत पोखरामा घुम्ती विद्यालय संञ्चालन गरेको र माथी हिउँ अझै नपग्लेकोले चैतबाट मात्र विद्यालय खोल्ने भएका हुन । त्यसैगरी नयाँ शैक्षिक सक्रसँगै मुत्तिनाथ क्षेत्रका ४–५ वटा विद्यालय खुलेपनि हिमपात जारी रहेकोले विद्यार्थी उपस्थित भएका छैनन ।
‘मुस्ताङ्गमा नयाँ शैक्षिक सत्र सुरु भै अध्ययन/अध्यापन सुरु भएको छ । तर उपल्लो मुस्ताङ्गका दुई गाउँपालिका भित्रका विद्यालय भने घुम्ती पढाईसँग जाडो विदा मिलान गरिएकोले चैत १ गतेबाट मात्र खुल्छन’ शिक्षा विकास तथा समवन्यय इकाइ मुस्ताङ्गका शाखा अधिकृत टंकराज वरालले भने, ‘मुक्तिनाथ क्षेत्रका केही विद्यालय खुलेपनि हिमपातको कारण अझै विद्यार्थी आएका छैनन । पठाई सुरु भएका विद्यालयमा पनि हिउँ पर्नेक्रम जारी रहेकोले चिसो अधिक छ ।’