जंगलमा हराएका चार नेपाली पर्यटकको तेस्रो दिन उद्धार

१८ माघ २०७६, शनिबार १४:५७ मा प्रकाशित (3 हप्ता अघि)
पुनहिल संवाददाता

बाक्लो हिउँ पर्ने हिउँदे मौषम (अफ सिजन)मा हिमाली क्षेत्रको दुस्साहसी यात्रामा निक्लेका चार नेपाली पर्यटकको तीन दिनपछि अन्नपूर्ण गाउँपालिका, ४ नारच्याङ्गको रेलेखर्क नजिकैको घनाजंगल विचको खोंचबाट सकुसल उद्धार गरिएको छ ।
अन्नपूर्ण हिमालको पश्चिम फेदीमा अवस्थित ३ हजार ८ सय मिटर अग्लो खोप्राबाट तल नारच्याङ्ग गाउँ झर्ने क्रममा विहिवार दिउँसो बाटो विराएर बाक्लो हिउँ जमेको जंगलमा फसेका सर्लाहीका अंकित साह, सर्लाहीकै अभिसेक महतो, दोलखाका संजित लामा र धनगढीका सुमन भट्टलाई आईतवार विहान खोजी तथा उद्धारमा गएका चुपिन पुर्जासमेतका स्थानीयले अन्नपूर्ण गाउँपालिका–४ नारच्याङ्गको रेलेखर्कको जंलग विचको खोंचबाट उद्धार गरेका हुन ।
‘स्थानीय युवासाथीहरुले दुई दिनदेखी हिउँमै बास बसेर उनीहरुको खोजी गरी उद्धार गरेका हुन’ घट्नास्थल पुगेर उद्धारमा जुटेका प्रमुख जिल्ला अधिकारी ज्ञाननाथ ढकालले भने, ‘उद्धार गरिएका अंकित र सुमन केही विरामी परेकोले हेलिकोप्टरबाट पोखरा पठाईएको छ । बाँकी दुई जनालाई हामीले गाडीमा राखेर नारच्याङ झरेका छौं । गाडीमै फर्कनुहुन्छ ।’
शुक्रवार उनीहरुसँग फोनमा कुराकानी भएपनि पर्यटकलाई भेट्टाउन सकिएको थिएन । फोनको लोकेसनको आधारमा रेलेखोलाको माथिल्लो भागको रेलेखर्क क्षेत्रमा खोजी केन्द्रीत गरिएको थियो । आईतवार थप स्थानीय समेत परिचालन भै खोजी तिब्र पारिएको थियो ।
अन्नपूर्ण, निलगिरी र वराह हिमालको फदीमा अवस्थित घना जंगलमा बाक्लो हिउँले छोपेको पदमार्गमा पर्यटक मात्र होईन स्थानीय गोठाला समेत हिँड्न असंभव प्रायः पदमार्गमा गाईड नलिई दुस्साहसी यात्रामा निक्लदा पदयात्री समस्यामा परेका हुन ।