डिएसपी फेरीएको जनाउ, लागुऔषध सहित कारोवारी पक्राउ

पुनहिल डट कम
४ साल अघि
२२४ पटक पढिएको

सदरमुकाम बेनीको मंगलाघाटबाट एकाघरका मनोज/आशिष खत्री दाजुभाई केही थान लागु औषधसहित पक्राउगरी प्रहरी नायव उपरिक्षक किरणजंग कुँवरले आफु जिल्ला प्रहरी प्रमुख भै आएको जनाउ गरेका छन ।
जिल्ला प्रहरीले इमेलमा उपलब्ध गराएको विवरण अनुसार माघ ६ गते साँझ बेनी नगरपालिका, ७ मंगलाघाट स्थित मनोज/आशिष खत्री दाजुभाई लागुऔषधको कारोवारी भएको सुराकीको आधारमा छापा मार्दा घरबाट डाईजापाम, १०४ एम्पुल, फेनेरागन, १०४ एम्पुल, नुर्फिन १०६ एम्पुल र सिरिन्ज २ थान सहित कारोवारी पक्राउ गरेको जनाएको छ ।

लागु औषध सेवानकर्ता/भरिया वा जुवाडे पक्राउ गरी जिल्ला प्रहरी प्रमुख फेरिएको संकेत गर्ने प्रचलन रहेको म्याग्दी प्रहरीको अभिलेखले पुष्टी गर्छ । अभिलेख अनुसार प्रहरीले ०७३ बैशाख, ०७४ फागुन, ०७५ पुस र ०७६ असार पहिलो दिनमा डाईजापाम, फेनेरागन, नुर्फिन तथा सिरिन्ज करिव उत्तिकै मात्रामा बरामद सहित भरिया/सेवनकर्ता र कारोवारी पक्राउ गरेको थियो ।
‘पहिलोपटक लागुऔषधका स्थानीय कारोवारीसम्म पुगेका छौं । जिल्लामा लागु औषध कारोवार बढ्दै गएको देखिन्छ’ जिल्ला प्रहरी कार्यालयका सूचना अधिकारी ध्रुवप्रसाद शर्माले भने, ‘अनुसन्धान भैरहेकोले थप जानकारी खुल्ने छ ।’
बर्षको एक पटक मात्र नयाँ प्रमुख फेरिँदाको पहिलो महिना मात्र लागुऔषध कारोवारी/भरिया वा जुवा खालमा छापा मार्नु संयोग मात्र हो वा अन्य अर्थ राख्छ प्रहरीले ब्यवहारमै जवाफ दिनु पर्ने भएको छ । यस अघि जिल्ला प्रहरी प्रमुख आएका बसुन्धरा खड्का र वीरबहादुर बुढाले मात्र आफ्नो कार्यकालमा जुवा खालमा छापा मारेका थिए ।
सदरमुकाम बेनी भित्राईएईने लागुऔषध (डाईजापाम, फेनोरागन) का बाहिर जिल्लाका भरियालाई पक्राउ गर्ने प्रहरीले दोस्रो कारोवारी/प्रयोगकर्तासम्म पुगेको दावी गरेको छ ।
पक्राउ परेका लागुऔषध कारोवारी/प्रयोगकर्ताहरुलाई जिल्ला अदालतबाट म्याद थपगरी अनुसान्धान सुरु गरेको जनाएको छ ।
सदरमुकाम बेनीसमेत लागुऔषध प्रयोगकर्ता किसोर–किसोरीको संख्या बढेको प्रहरीले दावी गरेको छ । सदरमुकामसमेत सहरी क्षेत्रमा ब्राउनसुगर, इन्जेक्सनबाट लागुऔषध सेवनकर्ता बढी छन । सहरी क्षेत्रमा मात्र होईन जिल्लाका अधिकांश ग्रामिण क्षेत्रका विद्यालय तहमा समेत चरेस र गाँजा जस्ता नसालु पदार्थ सेवन गर्ने बढेका छन । विद्यालय तहको कलिलो उमेरमा मदिरा सेवन गर्नु त समान्य जस्तै भएको छ । डाक्टरको प्रिस्क्रिप्सन र विरामीको अभिलेख विना प्रयोग गर्न नपाईने डाईजीपाम, क्लोनाजीपाम, अल्प्राजोलाम जस्ता औषधी गिरोहहरुले विद्यालय, क्याम्पसका विद्यार्थीसम्म पुर्‍याएका छन ।
प्रहरीका अनुसार यो बर्ष सदरमुकाममा सिरिन्जबाट नसा लिने दुर्ब्यसनीको संख्या देखिन थालेको छ । औषधीको दुरुपयोग गर्नेबाहेक ब्राउण्ड सुगर, चसेर, गाँजा सेवनकर्ता पनि उल्लेख्य छ । कहिले काहीं यस्ता दुर्वसनी पक्राउ पर्ने भएपनि तस्करसम्म पुग्न प्रहरी अक्षम छ । श्रोतका अनुसार जिल्लाको पश्चिम दरवाङ्ग र उत्तरको दाना क्षेत्रबाट गाँजाचरेस पोखरा, काठमाण्डौ तथा बुटवलतर्फ निकासी हुने अनुमान गरिन्छ ।