पुनहिल संवाददाता
धौलागिरी गाउँपालिकाको वडा नं १ गुर्जा, २ लुलाङ, ३ मुना, ४ मुदी र ७ ताकमका विरामीले बाक्लो हिउँ छिचोल्दै स्वास्थ्य शिविरमा आएका थिए । शिविरमा नाक, कान, घाँटीका २ सय १०, हाडजोर्नीका २ सय ७०, स्त्रीरोगका २ सय ५०, छातीमुटु रोगका ३ सयबढी, छाला तथा यौनरोगका १ सय ५० र दाँतका समस्या हुने २ सय ५० जना विरामीको निशुल्क उपचार गरिएको लायन्स क्लव अफ बेनी पीससिटीका अध्यक्ष नरेश श्रेष्ठले बताए । शिविरमा २ सयबढी स्त्री तथा पेटका रोगीले भिडियो एक्सरे सेवा पनि लिएका थिए । गण्डकी मेडिकल कलेज पोखरा र धौलागिरी गाउँपालिकाको प्राविधिक तथा ब्यवस्थापकीय सहकार्य गरेका हुन । शिविरमा वितरित सवै औषधी आयोजक लायन्स क्लव अफ बेनी पीससिटीले ब्यवस्थापन गरेको हो ।
स्वास्थ्य शिविरमा गण्डकी मेडिकल कलेज पोखराका डाक्टरहरु क्रमश ः स्त्रीरोगकी डा. सविता थापा, मेडिसिनका डा.तीर्थलाल उपध्याय, हाडजोर्नीका डा.कृष्ण विष्ट, रेडियोलोजिष्ट डा। नवराज पौडेल, बालरोगका डा राशनी वास्तकोटी, छाला तथा यौनरोगका डा सौरभ अर्याल, नाक, कान, घाँटीका पुर्शव शाह र दन्तका डाक्टर टिकाराम गुरुङ्गसमेतको २३ जनाको श्वास्थ्यकर्मी टोली संलग्न भएको थियो ।‘लायन्स क्लव वेनी पीससिटीका साथीहरुले ब्यक्तिगत र केही अन्य साथीहरुसँग आर्थिक सहयोग जुटाएर शिविर आयोजना गरिएको हो’ क्लवका संस्थापक राजेश शाक्यले भने, ‘दुर्गम भेगका अधिकांश विरामीले विरामीहुँदा कहिल्लै डाक्टरी सेवा लिन नपाएका धेरै छन । उनीहरुकालागी यस्तो निशुल्क स्वास्थ्य शिविर उपयोगी छ ।’तस्वीर ः नवविकल्पबाट
