ओमकुमारी शान्ति कोषद्धारा संरक्षक सदस्यलाई स्वागत

विपन्न म्याग्देलीको उपचारमा सघाउदै आएको परोपराकी संस्था ओमकुमारी शान्ति कोषले शुक्रबार संरक्षक सदस्यलाई बेनीमा स्वागत तथा सम्मान गरेको छ ।
संस्थाको बिधान अनुसार व्यक्तिगत रुपमा दुई लाख रुपैयाँ भन्दा बढी सहयोगको घोषणा गर्नुभएका धवलागिरी गाउँपालिका–७ धारापानी घर भई हाल हङकङमा बस्दै आउनुभएका ज्ञानबहादुर थापा र उहाँकी श्रीमती सुमित्रालाई सम्मान गरिएको हो ।

मोना हङकङका पूर्व कोषाध्यक्ष थापाले कोषले स्थापना गर्न लागेको डेढ करोड रुपैयाँको अक्षयकोषका लागि रकम जुटाउन हङकङमा आयोजना गरेको कार्यक्रममा हङकङबाट सबैभन्दा बढी व्यक्तिगत रुपमा आफूले सहयोग गर्ने घोषणा गर्नुभएको थियो ।
हाइपो पलास्टिक एनिमिया रोगबाट थलिएकी बेनी नगरपालिका–४ की ओमकुमारी पुन शान्तिको स्मृतिमा स्थापित कोषले एक सय जना भन्दा बढी जटिल रोगबाट थलिएका बिरामीलाई एक करोड रुपैयाँ बढी सहयोग जुटाएर सहयोग गरेको छ । जटिल रोगले थलिएका म्याग्देलीको उपचारमा सघाउने उद्देश्यले कोषले डेढ करोड रुपैयाँको अक्षयकोष स्थापना गर्ने अभियान चलाएको छ । पाँच हजार ५०० रुपैयाँ शूल्क तिरेर आठ सय जना भन्दा बढी कोषको आजिवन सदस्य बनेका छन् ।