सहुलियतपूर्ण कर्जा दिन आनाकानी गर्ने बैंकलाई कारवाही गरिनेः अर्थमन्त्री

अर्थमन्त्री डा. युवराज खतिवडाले बैंकहरूले सहुलियतपूर्ण कर्जा दिन आनाकानी गरेमा सिधै आफूलाई इमेल गर्न आग्रह गरेका छन । बुधबार काठमाडौंमा आयोजित सहुलियतपूर्ण कर्जाका लागि ब्याज अनुदान सम्बन्धी एकीकृत कार्यबिधि (दोस्रो संशोधन) २०७६ सम्बन्धी घोषणा सभामा बोल्दै अर्थमन्त्री खतिवडाले उक्त आग्रह गरेका हुन् ।

अर्थमन्त्री खतिवडाले भने, सहुलियतपूर्ण कर्जा लिन आवश्यक पर्ने प्रकृयाहरु पुरा गर्दा पनि बैंकहरूले कर्जा दिन आनाकानी गरेको खण्डमा अर्थ मन्त्रालयमा हट लाईन तथा इमेल गर्न अनुरोध गरेका हुन् । यस्तो गरेको पाइएमा मन्त्रालयले अवस्था हेरेर उक्त बैंकहरुलाई कारबाही गर्ने छ ।

बैंकहरुले उद्यमी नागरिक तयार गर्दा आफ्नै व्यापार व्यवसायमा वृद्धि हुने अर्थमन्त्रीको भनाई छ । अर्थमन्त्रीले बैंकहरुलाई आफ्नो आधार दरको वरपर रहेर कर्जा परिचालन गर्न अनुरोध गरे ।

त्यसैगरी अर्थमन्त्री बैंकले कर्जा जसरी भए पनि उठाउने हुँदा त्यसको सही सदुपयोग गरी बैंकको कर्जा तिर्न समेत युवाहरूलाई आग्रह गरे । सहुलियपूर्ण कर्जा हिनामिना नगरी देशको उत्पादन वृद्धिमा लगाउनु पर्नेमा खतिवडाले जोड दिए ।

त्यसैगरी युवाहरूलाई स्वरोजगार तर्फ अभिमुख गर्न स्कुलदेखि नै सीप सहितको ज्ञान विकास र व्यसायिक शिक्षा सीटीइभीटीका कक्षा सञ्चालन भएको र त्यसमा सरकारले धेरै लगानी गरेको बताए ।
राष्ट्रिय वाणिज्य बैंकका सीईओ किरणकुमार श्रेष्ठले बैंकले हालसम्म ६ हजार जनालाई ६ अर्ब ८१ करोड ६० लाख रूपैयाँ सहुलियतपूर्ण कर्जा वितरण गरिसकेको जानकारी गराए ।