एनसीएचएलले सीमित अवधिका लागी कनेक्ट आईपीएस प्रणालीमा आफ्नो बैंक खाता लिङ्क गरी भेरिफाई गराइसकेका ग्राहकहरुले मोबाईल नम्बरको आधारमा गरिने फण्ड ट्रान्स्फर निःशुल्क गरेको हो ।
यसबाट कनेक्ट आईपीएसका ग्राहकहरुलाई सिधैं आफ्नो बैंक खाताबाट रियल–टाइम फण्ड ट्रान्सफर गर्न थप सुविधा पुग्ने एनसीएचएलको अपेक्षा छ ।
एनसीएचएलले ५३ भन्दा बढी बैंक तथा वित्तिय संस्थाहरुमार्फत ग्राहकहरुका लागि बैंक खातामा आधारित रियल–टाइम भुक्तानी गर्न कनेक्ट आईपीएस, इपेमेन्ट प्रणाली संञ्चालन गरिरहेको छ ।
यस प्रणालीमा अनलाइन फण्ड ट्रान्सफर, पेमेन्ट प्रोसेसर (गेटवे), क्रेडिट कार्ड, बिलभुक्तानी, सरकारको राजस्व भुक्तानी, लोकसेवा आयोग आवेदन शुल्क भुक्तानी, कम्पनी रजिष्ट्रार कार्यालयको भुक्तानी ,नागरिक लगानी कोषको भुक्तानी, सामाजिक सुरक्षा कोष सम्बन्धी भुक्तानी, मोबाईल वालेटमा फण्ड लोड, नेप्से अनलाईन ट्रेडिङ्ग तथा सेयर ब्रोकरलाई भुक्तानी लगायतका सेवाहरु उपलब्ध रहेका छन् ।
कनेक्ट आईपिएस भनेको के हो ?
नेपाल क्लियरिङ्ग हाउस लिमिटेडले कनेक्ट आईपिएस भुक्तानी प्रणालीलाई सिङ्गल पेमेन्टस् प्लेटफर्म को रुपमा स्थापित गर्न विभिन्न विशेषता सहित औपचारिक शुभारम्भ गरेको छ। बैंक खाताबाट गरिने कारोबारहरुलाई प्रोत्साहन गर्न यो प्रणाली सञ्चालनमा आएको हो।
कनेक्ट आईपिएस भुक्तानी प्रणाली मार्फत बैंकका ग्राहकहरुले www.connectips.com मा गई आफूलाई एक पटक आबद्ध गरी आफ्नो बैंक खातालाई लिंक गराई सिधै आफ्नो बैंक खाता मार्फत कारोबारहरु गर्न सक्ने व्यवस्था रहेका छन्। यस्ता सबै कारोबारहरु अनलाईन मार्फत सिधै बैंक खाताबाट हुने हुँदा कारोबार सहज हुन्छ।
यस प्रणाली मार्फत नेपाल सरकारको राजस्व भुक्तानी र रकम ट्रान्सफरको भुक्तानी क्रेडिट कार्ड बिल भुक्तानी, मोबाईल वालेटको फण्ड लोड, शेयर ब्रोकरको भुक्तानी लगायतका अन्य भुक्तानीहरु पनि सजिलै गर्न सकिनेछ। यस प्रणालीको प्रयोग अनलाईन तथा मोबाईल एप्स दुबै मार्फत गर्न सकिनेछ। अनलाइन मार्फत प्रति कारोबार १ लाख रुपैयाँसम्मको भुक्तानी गर्न सकिने छ भने मोबाईल एप्स मार्फत प्रति कारोबार ५ हजार रुपैयाँसम्मको भुक्तानी गर्न सकिनेछ।
पुनहिल संवाददाता
