श्रीमान्–श्रीमति नै अख्तियारको नियन्त्रणमा

म्याग्दी, २७ भदौ ।

स्वास्थ्य कार्यालय म्याग्दीमा कार्यरत एक दम्पत्ती अख्तियार दुरुपयोग अनुसन्धान आयोगको नियन्त्रणमा परेका छन ।

आव ०७५/०७६ मा संञ्चालित विभिन्न कार्यक्रम गर्न लिएको पेश्की फर्स्यौट गर्न पेश गरेका वीलभरपाई फर्जी भेटिएपछि हेल्थ असिस्टेन्ट अधिकृत भरत आचार्य र सोही कार्यालयमा कार्यरत राधिका आचार्यलाई अख्तियार दुरुयोग अनुसन्धान आयोग टंगालले नियन्त्रणमा लिएर छानविन अघि बढाएको छ ।

भरत र राधिका आचार्य श्रीमान्श्रीमती हुन । हेल्थ असिस्टेन्ट अधिकृत भरत आचार्यले कार्यक्रम संञ्चालन गर्न लिएको ९ लाख र पत्नि अनमी राधिका आचार्यले लिएको ४ लाख बजेटका कार्यक्रमको अस्वभावीक मुल्य राखिएका फर्जी वील फेस गरेको भेटिएपछि आचार्य दम्पत्ति अख्तियारको नियन्त्रणमा परेका हुन ।

पेश्की फस्यौट गर्न अस्वभाविक र फर्जी वील पेश गरेका भरत आचार्य आफैले कार्यालय प्रमुख, लेखा शाखा प्रमुख समेतका कर्मचारीले घुस मागेको भन्दै अख्तियारमा उजुरी गरेका थिए । सोही उजुरीमा छानविन क्रममा बयानकालागी अख्तियार पुगेका आचार्य दम्पत्ति उल्टै नियन्त्रणमा परेका हुन ।

कार्यालय प्रमुख भीमप्रसाद आचार्य, लेखापाल हरीशंकर शर्माले फर्जि विलको आधारमा पेश्की फस्यौट गर्न नसक्ने बताएपछि उनै भरत आचार्यले कार्यालय प्रमुख भीमप्रसाद, लेखापाल हरीशंकर र जिन्सी शाखाका रघुनाथ रेग्मीले पेश्की फर्स्यौट गर्न घुस मागेको भन्दै अख्तियार दुरुपयोग अनुसन्धान कार्यालयमा उजुरी गरी पक्राउ गराएका थिए । बिशेष अदालतले पक्राउ परेका कार्यालय प्रमुख भीमप्रसाद, लेखापाल हरीशंकरलाई जनही एक लाख ३० हजार र जिन्सी शाखाका रघुनाथ रेग्मीलाई भने ५० हजार धरौटी लिएर तारेखमा छोडेको छ ।

अख्तियारले कार्यालयका फाईल र स्थलगत अनुसन्धान गर्दा उल्टो निवेदकले नै फर्जी वील पेशगरी पेश्की फर्स्यौट गर्न दवाव दिएको खुलेपछि नियन्त्रणमा लिएर छानविन थालेको हो ।

भरत दम्पत्तिले कार्यालय प्रमुख, लेखा र जिन्सी शाखा प्रमुख अख्तियारको निययन्त्रणमा लिएको अवसर छोपेर भरत आचार्य र तथ्याङ्ढ प्रमुख मेघनाथ रेग्मीले कार्यालय प्रमुख र लेखा फाँटमा अख्तियारले लगाएको ताला फोडेर फाईल नष्ट गर्ने प्रयास पनि गरेका थिए ।