आज:  | Tue, 05, Jul, 2022

गलेश्वर बेलिब्रिज उच्च जोखिममा

२३ असार २०७६, सोमबार ०७:४५ मा प्रकाशित (2 बर्ष अघि)
पुनहिल संवाददाता
म्याग्दी, २३ असार ।बेनी–जोमसोम–कोरला सडकको गलेश्वर स्थित राहुघाट नदी माथी निर्मित बेलीव्रिज भत्कने जोखिममा छ ।बेनी–जोमसोम–कोरला सडक आयोजना अर्न्तगत रहुघाट नदीमाथी निर्माणाधिन पक्की पुलको फाउण्डेसन निर्माण ढिलाईले पानीको बहाव परिवर्तन भै बेलीव्रिजको गलेश्वर पट्टीको फाउण्डेसन भासिएको हो ।‘बेलीव्रिज उच्च जोखिममा छ । कुनैपनि बेला बेनी–जोमसोम सडक अवरुद्ध हुने अवस्था छ’ प्रमुख जिल्ला अधिकारी लिलाधर अधिकारीले भने, ‘आयोजना प्रमुखलाई तत्काल व्रिज संरक्षणमा काम थाल्न निर्देशन गरेको छु ।’सदरमुकाम बेनीदेखी ३ किलोमिटर उत्तर बेनी नगरपालिका, ९ गलेश्वर र रहुगंगा गाउँपालिका, ३ पिप्लेको सीमावर्ती राहुघाटको पिप्लेपट्टी पक्की पुलको फाउण्डेसन राख्न नदीको बहाव विपरित गलेश्वरपट्टी सोझिएर कटान थालेपछि बेलीव्रिज जोखिममा परेको हो ।‘ठेकदारको चरम लापरबाही र काम प्रतिको हेलचक्र्याईले बेनी–जोमसोम र उत्तरी भेग जोड्ने बेलिव्रिज मात्र होईन पिप्लेपट्ट पुलमुख वस्ती पनि बाढीको जोखिममा परेको छ’ स्थानीय मोहन केसीले भने, ‘वस्ती र ब्रिज जोगाउन तत्काल तटवन्ध आवश्यक छ । तत्काल नदी कटान नरोके मुस्ताङ्ग तथा उत्तरी भेगका रघुगंगा र अन्नपूर्ण गाउँपालिका यातायात सम्पर्क विच्छेद हुन्छ ।’पुलको ठेक्का लिएको शर्मा/युनाईटेड विल्डर्स जे/भी काठमाण्डौले पुलको फाउण्डेसन निर्माणमा ढिलाई तथा लापरबाही गर्दा समस्या आएको हो । फाउण्डेसन राख्न पुरानो तटवन्ध भत्काएको पनि नयाँ नराखिएकोले गलेश्वर वस्ती समेत व्रिज उच्च जोखिममा परेको छ ।नदीमा हरेक दिन पानीको सतह बढेको छ । मनसुन सुरु भएकोले नदीमा पानीको सतह बढेपछि ठेकदारले फाउण्डेनकालागी खनेको खाडलमा जग समेत राख्न सकेको छैन । बेलीव्रिजले बेनी–जोमसोम सडकबाहेक जिल्लाका रघुगंगा र अन्नपूर्ण गाउँपालिकाका सडकलाई पनि जोड्छ ।