आज:  | Sat, 25, Jun, 2022

असुरक्षित बन्दै बेनी–जोमसोम सडक

२ असार २०७६, सोमबार १२:५४ मा प्रकाशित (3 बर्ष अघि)
पुनहिल संवाददाता
म्याग्दी, २ असार ।अक्करे भिर खोपेर निर्माण गरिएको अप्ठ्यारो तथा बाढी पहिरोको उच्च जोखिममा रहेको बेनी–जोमसोम सडकमा लुटेरा समेत देखिन थालेका छन ।बेनी–जोमसोम ७६ किलोमिटर सडकको गलेश्वर–बैसरी–तिप्ल्याङ्ग–तातोपानी सम्मको २० किमी लामो अक्करे भीर र जंगल क्षेत्रमा कुनै सुरक्षा निकाय नभएको र वस्ती पनी नभएकोले रातीको समयमा लुटेरा देखिन थालेका हुन ।बेनी–जोमसोम–कोरला सडकमा यात्ररत जीपका यात्रुलाई लुट्ने रघुगंगा गाउँपालिका, १ का यजन पुर्जा, अन्नपूर्ण गापा, ७ का समिट पुन र पर्वत जलजला गापा, १ का कुसल पाईजालाई प्रहरीले पक्राउ गरेको छ ।पोखराबाट बेनीहुँदै लोमन्थाङ जाँदै गरेको ग १ ज ५९०९ नम्बरको यात्रु बाहक जीपलाई सोमबार विहान ३ बजे रघुगंगा गापा, १ तिप्ल्याङ्ग छेउ भीरमा रोकेर १५ हजार नगरसहित झोला लुटपाट गरेका थिए । राती बाटोमा लुटिएपछि यात्रुले १० किमी अगाडी रहेको सीमा प्रहरी चौकी तातोपानीमा पुगेर उजुरी गरेका थिए ।‘विहान ३ बजे बेनी–जोमसोम सडकमा जीपमा यात्रारत यात्रु लुटिएको खवर पाउनासाथ प्रहरी परिचालन भै घट्नास्थल नजिकै तिप्ल्याङ बजारबाट लुटपाटमा संलग्न तीनै जनालाई पक्राउ गरेका छौं’ जिल्ला प्रहरी प्रमुख डिएसपी महेन्द्रप्रसाद मरासिनीले भने, ‘बेनी–जोमसोम सडकमा बाढीपहिरोसँगै लुटपाट र डकैतिको जोखिम पनि थपिएको छ ।’