आज:  | Sat, 02, Jul, 2022

दुर्घटनामा निलगिरी हाईड्रो मजदुरको मृत्यु

१२ फाल्गुन २०७५, आईतवार १२:५८ मा प्रकाशित (3 बर्ष अघि)
पुनहिल संवाददाता

अन्नपूर्ण गाउँपालिका, ४ नारच्याङ्गमा निर्माणाधिन ६२ मेगावाट क्षमताको निलगिरी जलविधुत आयोजनामा कार्यरत एक जना मदजुरको भीरबाट खस्दा घट्नास्थलमै मृत्यु भएको छ ।

पहरामा विष्फोटनकालागी होल खन्ने क्रममा लडेर शनिवार सुनछहारी गाउँपालिका, ३ गाम रोल्पाका २० बर्षिय तिलक घर्ती मगरको मृत्यु भएको हो । घलेम्दी र मिस्त्रीखोलाको दोभादनबाट निलगिरी जलविधुत आयोजनाको मुहान तर्फ निर्माणाधिन प्रवेश मार्गमा विष्फोटनकालागी होल खोल्ने क्रममा निलगिरी खोलामा खसेको प्रहरीले जनाएको छ ।

अक्करे भिरमा कार्यरत मजदुरको सुरक्षामा सेफ्टी वेल्ट जस्ता आधारभुत सुरक्षा सावधानी नअपनाउँदा मजदुरको मुत्यु भएको प्रहरीले बताएको छ । दुर्घटना स्थमा केही महिना अघि सडक खन्नेक्रममा डोजर खस्दा एक मजदुरको पनि मृत्यु भएको थियो ।

‘मृतकको पोष्टमार्टम गरी शव आफन्तलाई बुझाउन मृतकको घरमा खवर पठाइएको छ’ जिल्ला प्रहरी कार्यालयका सुचना अधिकारी लोकबहादुर गुरुङ्गले भने, ‘निर्माणस्थलमा प्रयाप्त सावधानी नअपनाउँदा दुर्घटना भएको देखिन्छ । मृतकलाई किरिया खर्च र विमा समेतका सुविधा उपलब्ध गराउन आयोजनाका ठेकदारलाई झिकाएका छौं ।’

अन्नपूर्ण र निलगिरी हिमालको वेश क्याम्प मार्गमा ६२ मेगावाट क्षमताको निलगिरी क्यास्केट र छुट्टै ३८ मेगावाट क्षमताको निलगिरी दोस्रो जलविधुत आयोजना निर्माण गर्न प्रवेश मार्ग निर्माण भैरहेको छ ।