हिमालपारीको हिमपात

पुनहिल डट कम
६ साल अघि
३६७ पटक पढिएको

हिमालपारीको जिल्ला मुस्ताङमा भएको भारी हिमपातले जनजीवन कष्टकर भएको छ । बाक्लो हिउँले पदमार्ग पत्ता लगाउन नसक्ने अअवस्था आएपछि मुस्ताङ घुम्न आएका आन्तरिक तथा बाह्य पर्यटक अलपत्र परेका छन । सडक तथा हवाई यातायात पनि ठप्प छ ।

मुस्ताङ जिल्लाभर हिमपात भएकोले नदीबाहेकका सवै भूभागमा बाक्लो हिउँ जमेकोले हिमाल झै बनेको छ । सेताम्मे हिउँले ढाकेका बालुवाका पहाड, बाटो, खेत र घरहरु । विश्व सम्पदा सूचिमा प्रस्तावित ‘माटोको शहर’ मुस्ताङको उपल्लो भेग लोमन्थाङ अहिले बाक्लो हिउँले छोपिएको छ ।

उपल्लो मुस्ताङका लोमन्थाङग, छोसेर, छोनुप, चराङ, घमी लगाएतका सात वस्ती स्थलमार्गबाट विच्छेद भएका छन । बाटोमा बाक्लो हिउँ जमेकोले एक बस्तीबाट अर्कोमा समेत विच्छेद भएका छन ।

जोमसोम विमानस्थलको धावन मार्गमा बाक्लो हिउँ जमेकोले पोखरा–जोमसोम उडान पनि अवरुद्ध छ । बेनी–जोमसोम सडकको मुस्ताङ खण्डकको घासा–जोमसोम–मुक्तिनाथ समेत सवै सडक हिउँले ढाकिएकोले सवारी चल्न सक्ने अवस्था छैन । सडक तथा हवाई यातायात अवरुद्ध भएपछि मुस्ताङ भ्रमणमा रहेका बाह्य तथा आन्तरिक पर्यटक विभिन्न स्थानमा रोकिएका प्रहरीले जनाएको छ । पोखरा, काठमाण्डौ समेतका शहरबाट मोटरसाईकलमा मुस्ताङ घ्ुम्न आएका आन्तरिक पर्यटक मुस्ताङमा अल्झेका छन ।

‘हिमपातले धनजनको क्षतिको जानकारी आएको छैन । तर धेरै आन्तरिक तथा बाहय पर्यटक जोमसोम समेत विभिन्न ठाउँमा रोकिएका छन । वाईकमा आएका आन्तरिक पर्यटक अलपत्र छन’ मुस्ताङका प्रहरी प्रमुख महेन्द्र खड्काले भने, ‘जोमसोममा भन्दाबढी तल लेते क्षेत्रमा बाक्लो हिउँ परेकोले सडक छिचोल्न समस्या छन । धेरै वर्षपछि बाक्लो हिउँ परेको भन्दै यहाँका कृषक सास्ती विर्सेर उत्साही छन ।’

डिएसपी खड्काका अनुसार ६ इन्चदेखी २ फिटसम्म बाक्लो हिउँ परेकोले अझै केही दिन विमानस्थलको रन वे खुल्ने संभावना छैन । सडकको अवस्था पनि यही हो । पदयात्री केही पर्यटक भने जोखिम मोलेरै जोमसोमबाट तल मार्फा, लेते तर्फ हिंडेका छन । जोमसोमदेखी माथी मुक्तिनाथ जाने सडक केही दिनदेखी बन्द रहेकोमा अव थप केही समय खुल्ने छैन ।

सडक तथा हवाई धावनमार्गमा बाक्लो हिउँ थुप्रो लागेकोले मुस्ताङका सवै सडकमा र पोखरा–जोमसोम हवाई यातायात अवरुद्ध छ । बाक्लो हिमपातले वल्लोपल्लो घर गर्न समेत कठिन भएको छ । चिसोले चर्पीको पानी जमेकोले दिसा पिसावमा समेत समस्या छ ।