जीपमा मोटरसाईकल ठोक्किदा तीन घाईते

सदरमुकाम बेनीदेखी २ किमी उत्तर जलेश्वरमा मंगलवार दिउँसो ३.३० बजे जीप र मोटरसाईकल एक आपसमा ठोक्किदा सवार तीन जना घाईते भएका छन ।

मुस्ताङबाट पर्यटक लिएर पोखरा जाँदै गएको ध १ च २३५ नम्बरको बोलेरो जीपसँग बेनीबाट गलेश्वर जाँदै गरेको ध १ प ३५४९ नम्बरको भिआर मोटरसाईकलमा ठोक्किदा रघुगंगा गापा, ६ पाखापानीका मनी पुर्जा (२०), अम्मर पाईजा (२५) र सन्तोष थजाली (२२) घाईते भएका छन ।

टाउको, छाती र खुट्टामा गहिरो चोटलागी गम्भीर घाईते सन्तोष र अम्मरलाई बेनी जिल्ला अस्पतालमा उपचारपछि थप उपचारकालागी हेलिकोप्टरबाट पोखरा रिफर गरिएको जिल्ला प्रहरीले जनाएको छ ।

‘सडकको साँघुरो घुम्तीमा मोटरसाईकलले गलत साईट लिँदा दुर्घटना भएको हो । जीप र मोटरसाईकल दुवैले हर्न लगाउने समेतका सावधानी अपनाएको भए, दुर्घटना टर्न सक्थ्यो’ प्रत्यक्षदर्शी समेत रहेकी मंगला गाउँपालिका उपाध्यक्ष सृजना केसीले भनिन, ‘जीप र मोटरसाईकल ठोक्किँदा ठूलो आवाज आयो, अनि यात्रु माथी उडेर सडकमा पछारिएका थिए ।’