यी हुन् नक्कली इन्स्पेक्टर, लोक सेवाकै परीक्षा गराए

लोक सेवा आयोगकै परीक्षा भनी नक्कली काम गर्ने ठगको गिरोहलाई वीरगञ्ज प्रहरीले पक्राउ गरेको छ ।

मुख्य योजनाकार बाराको जीतपुर सिमरा उपमहानगरपालिका(७ चौधरी टोलका २९ वर्षीय अजय कुमार रायसहित ६ जना पक्राउ परेका हुन् ।
अजयले आफू प्रहरी इन्सपेक्टर भन्दै कार्ड देखाउँदै प्रहरी र अन्य सरकारी जागिर खुवाउने भनी रकम असुली गरिरहेका थिए ।
त्यही क्रममा उनले वीरगन्जमा लोकसेवा आयोगको किर्ते परीक्षा सञ्चालन गरेको थाहा पाएपछि प्रहरीले पक्राउ गरेको हो ।
सरकारी पदमा जागिर लगाइदिने भन्दै पर्सा, बारा र सर्लाहीका २१ जनालाई परीक्षा हलमा राखेर नक्कली परीक्षा लिँदै गरेको अवस्थामा उनीहरु पक्राउ परेको पर्साका प्रहरी नायव उपरीक्षक मनोजित कुवँरले जानकारी दिए ।

वीरगन्ज १६ नगवास्थित देव पार्टी प्यालेसमा बुधबार परीक्षा लिँदै गरेको अवस्थामा उनीहरु पक्राउ परेका हुन्। परीक्षा हलबाट नक्कली प्रहरी सहायक निरीक्षकको प्रवेश पत्र २ थान, राष्ट्रिय अनुसन्धान विभागको सहायक सूचक पदको प्रवेश पत्र २१ थान, त्यसकै प्रश्नपत्र २६ थान र खरिदारको प्रवेशपत्र १ थान समेत बरामद गरिएको छ ।

अजय यसअघि पनि सरकारी छाप दस्तखत किर्ते मुद्दामा कारागारमा कैद सजाय भुक्तान गरिसकेका व्यक्ति भएको प्रहरीले जनाएको छ ।