वालिङ–१४, तमादीकी माया नेपालीको घरमाथिबाट बिहीबार बिहान ६ बजेतिर खसेको पहिरोमा पुरिँदा परिवारका ५ जनाको मृत्यु भएको छ भने ४ बेपत्ता छन् ।
मृत्यु हुनेमा ४८ वर्षीया माया नेपालीसहित २७ वर्षीया उमाकला नेपाली, ३० वर्षीय दीपक नेपाली, ६० वर्षीया सानी नेपाली र ९ वर्षीय विवश नेपाली हुन् । बेपत्ता ४ जनाको खोजी कार्य भइरहेको प्रहरीले जनायो । पहिरोमा मायाको परिवारका १० जना सदस्य पुरिएका हुन् ।
पहिरोमा पुरिएकी १६ वर्षीया मनीषा नेपालीलाई भने जीवितै उद्धार गरी उपचारार्थ गण्डकी मेडिकल कलेज, पोखरा पठाइएको छ ।
प्रहरीद्वारा स्थानीयको सहयोगमा अन्य ४ जनाको उद्धार कार्य भइरहेको जिल्ला प्रहरी कार्यालय स्याङ्जाका प्रवक्ता प्रहरी नायव उपरीक्षक राजेन्द्र अधिकारीले जानकारी दिए ।
उता, कालीगण्डकी गाउँपालिका ४, गौतमडाँडाका बाबुराम दमाई र जगतबहादुर दमाइको घरमाथिबाट गएराति करिब ३ बजे पहिरो खस्दा बाबुरामका १६ वर्षीय छोरा विष्णुको मृत्यु भएको छ ।
