सदरमुकाम जोड्ने सवै सडक अवरुद्ध

मंगलवार साँझ देखी लगातार परेको बर्षापछि आएको पहिरोले सदरमुकाम बेनी जोड्ने सवै सडकमा यातायात अवरुद्ध भएको छ । सदरमुकाम जोड्ने मात्र होईन जिल्लाका सवै ग्रामिण सडकहरु पनि बाढीपहिरोले यातायात अवरुद्ध छन ।
बेनीबाट पोखरा समेत राजधानी जोड्ने सडकमा सहस्रधारामा पहिरोले झरेपछि यातायात अवरुद्ध भएको छ । त्यस्तै उत्तर रघुगंगा, अन्नपूर्ण गाउँपालिका समेत मुस्ताङ जोड्ने बेनी–जोमसोम सडकको जलेश्वर, चमेरे, गुईठे र रुप्से छहरा नजिक सडकमा पहिरो खसेकोले यातायात अवरुद्ध छ । सोही सडकको बेगखोलामा बाढी आएकोले पैदय यात्रु समेत यातायात पूर्ण बन्द भएको छ ।
त्यस्तै सदरमुकामबाट पश्चिम मंगला, मालिका र धौलागिरीहँुदै बाग्लुङ्ग पश्चिम बुर्तिवाङ जोड्ने सडकको तातोपानी नजिक घुमाउने र दरवाङ नजिक पहिरो झरेको तथा बेनी–बाग्लुङ्ग जोड्ने सडक बेनी नगरपालिकाको रानीवन तथा खवरामा पहिरोले सडक बगेकोले यातायात अवरुद्ध भएको प्रहरीले जनाएको छ ।
पछिल्लो १२ घन्टादेखी लगातार बर्षा भैरहेको भएपनि जिल्लाभर मानवीय तथा अन्य भौतिक क्षतिहुने गरी पहिरो गएको जानकारी आएको छैन । सदरमुकाम जोड्ने सवै सडकमा यातायात अवरुद्ध भएकोले कहीं विपद आएमा उद्धार तथा खोजकर्ता पुर्‍याउन समस्या भएको जिल्ला दैविप्रकोप ब्यवस्थापन समितिले जनाएको छ ।
‘मंगलवारबाट लगातार पानी परिरहेको र अझै केही दिन भारी/अतिभारी वर्षा हुनसक्ने जोखिम क्षेत्रमा म्याग्दी पनि रहेकोले उच्च सतर्क अवस्थामा छौं । स्थानिय तहलाई पनि उच्च सतर्क अवस्थामा रहन समवन्यय गरेका छौं’ प्रमुख जिल्ला अधिकारी उमाकान्त अधिकारीले भने, ‘अहिलेसम्म कुनै विपदका घट्ना आएको छैन । दुभाग्यवस विपद आएमा सदरमुकामबाट सेना, शसस्त्र तथा प्रहरीको टोली तत्काल पुग्न सक्ने अवस्था छैन ।’