बामदेवले पार्टी छाडे पत्नी तुलसा थापा भने एमालेमै

नेकपा एमालेका नेता वामदेव गौतमले पार्टी अध्यक्ष केपी शर्मा ओलीलाई थुप्रै आरोपहरु लगाएर पार्टी परित्यागको घोषणा गरे पनि उनकी पत्नी तुलसा थापा भने एमालेको संसदीय दलको बैठकमा सहभागी भएकी छन्।

पार्टी अध्यक्ष तथा संसदीय दलका नेता केपी शर्मा ओलीले बोलाएको संसदीय दलको बैठकमा नेकपा एमालकी सांसदसमेत रहेकी थापा सहभागी हुन पुगेकी हुन्।

पार्टी फुटाएर एमालेका बरिष्ठ नेता माधवकुमार नेपाले नेकपा एकीकृत समाजवादी गठन गरेपछि उनको पार्टीको पक्षमा लाग्ने जनप्रतिनिधिहरुले पार्टी रोज्न सनाखत गर्ने समय सीमामा थापाले एमाले छाडेकी छैनन्।

उनी संसदीय दलको बैठकमा गएको प्रमाण सार्वजानिक गर्दै एमालेकी सांसद कोमल ओलीले दुईजनासँगै उभिएको फोटो भर्खरै ट्वीटरमार्फत सार्वजानिक गरेकी छिन्।

पति गौतमले अनेक आरोप लगाए पनि सांसद तुलसा थापाले यो वा त्यो पक्षमा कुनै सार्वजानिक अभिव्यक्ति दिएकी छैनन्। उता, बामदेव गौतम भने बहुदलीय जनवादलगायतका केही विषयका शर्तहरु माधव नेपालसामु राखेको भन्दै समाचारको विषय बन्दै आएका छन्।

एमाले परित्याग गरेको घोषणा गरे पनि उनी हालसम्म कुनै पार्टीमा गएका छैनन्। सांसद तुलसा थापा एमाले संसदीय दलको बैठकमा सहभागी भएका कारण बामदेवले राजीनामा दिएर ओलीलाई घुक्र्याउन मात्र खोजेका हुन् कि भन्ने टिप्पणी पनि एमालेजनले गर्न थालेका छन्।