दिल्लीमा पश्चिमा राष्ट्रहरुसँग समेत समन्वय गरी नेपालबारे परामर्श जारी, नेपाली सत्तामा अनिष्टकाे संकेत

नेपालको पछिल्लो राजनीतिक घटनाक्रमबारे भारतको राजधानी नयाँ दिल्लीमा लामो परामर्श चलेको छ । नेपालमा बढेको चिनियाँ प्रभाव र त्यसकारणले समस्या उत्पन्न भएको भन्दै भारतीय सत्ताले पश्चिमा राष्ट्रहरुसँग समेत समन्वय गरेर परामर्श जारी राखेको बताइएको छ ।

यही परामर्शका लागि भनेर नेपालका लागि भारतीय राजदूत विनयमोहन क्वात्रा दिल्ली गएका छन् । झण्डै दुई साता लामो सो परामर्शको सिलसिलामा नेपालमा चीनको बढ्दो प्रभाव र दबाबलाई मूल विषय बनाइएको बताइएको छ । स्रोतले कुन कुन पश्चिमा राष्ट्रका प्रतिनिधिहरु यस्तो परामर्शमा सहभागी छन् भन्ने नबताए पनि चीनको सक्रियतालाई देखाएर नेपालबारे ठूलै हाउगुजी सिर्जना गर्न लागिएको त होइन भन्ने आशंका पनि शुरु भएको छ ।

राजदूत क्वात्रा दिल्लीबाट नेपाल फर्केपछि भारतको नेपाल नीतिमा भएको तत्कालको परिवर्तन समेत देखा पर्ने स्रोतको दावी छ । प्रधानमन्त्री भएको दुई महिना हुँदा पनि मन्त्रिपरिषद्समेत गठन गर्न नसकेर हैरान भएका प्रधानमन्त्री देउवाको सत्तारुढ गठबन्धनमा आउने सम्भावित खटपट र त्यसले फेरि संसद भंग गर्नुपर्ने अवस्था आउन सक्नेतर्फ भारतीय संकेतलाई देउवा र गठबन्धनका नेताले कसरी व्यवस्थापन गर्न सक्लान् भन्ने चासो पनि दिल्ली परामर्शसँगै प्रकट हुन थालेको छ ।

नेपालमा अमेरिकी सहयोगसम्बन्धी परियोजना एमसीसीबारे अत्यन्त धेरै अफवाहहरु फैलिएको र त्यसको पछाडि चीनले भूमिका खेलेको, एमसीसीबारे नभएका कुराहरु पनि भएजस्तै गरेर मिसइन्फर्मेशन क्याम्पेन नै चिनियाँ लगानीमा गरिएको केही तथ्यहरुसमेत संकलन गरेर दिल्लीमा पश्चिमा मुलुकका प्रतिनिधिहरुसँग छलफल गरिएको स्रोतको दावी छ ।

यसैबीच भारतीय सेनाले नेपाली सेनाका पूर्वप्रधानसेनापतिहरुलाई पनि एउटा सेमिनारको बहानामा दिल्ली निम्त्याएको छ । ८ जनामध्ये ३ जनाले आउन नसक्ने बताइसकेका छन् । सेप्टेम्बरको १७ र १८ मा हुने सो सेमिनारमा भारतीय सेनाका पूर्वसेनापतिहरुको सहभागिता हुनेछ । नेपालका सबै सेनापतिहरु पनि बोलाउनुको अर्थ नेपालबारे दिल्लीमा गम्भीरता थपिएको बुझ्न गाह्रो नभएको सैनिक स्रोतको दावी छ ।*डिसीनेपालबाट