सेयर बजारले समाउन थाल्यो सकारात्मक लय

सेयर बजारले क्रमशः लय समाउन थालेको छ । निषेधाज्ञाको बीचमा आइतबार नेप्से सूचकमा दोहोरो अंकको वृद्धि देखिएको छ । खरिदबिक्री रकम पनि औसतमा उत्साहप्रद रहेको छ । बैंकिङ प्रणालीमा सहज तरलताको अवस्था छ । तरलता सहज हुँदा ब्याजदर पनि क्रमशः घट्दो क्रममा रहेको छ । यसले सेयर बजारलाई सुस्त हिसाबले भए पनि माथि जान सहयोग पुग्ने देखिएको छ । सूचीकृत कम्पनीहरुको वित्तीय विवरण आइसकेको अवस्था छ ।
कोरोना संक्रमणका बीचमा औसतमा नाफा घटे पनि त्रसित भइहाल्नुपर्ने देखिएको छैन । यसर्थ, लगानीकर्ताहरुको आत्मबल क्रमशः सुधार हुने देखिएको छ । सेयर बजार तलमाथि गरिरहन्छ । नेप्से सधैं एउटै बाटोमा हिँड्दैन । घटेपछि बढ्ने अनि बढेको बजारमा फेरि करेक्सन आउने सेयर बजारको विशेषता नै हो । यसर्थ, आम लगानीकर्ताले बजारमा आफ्नो ठोस रणनीति तय गर्न सक्नुपर्छ ।
कहिले किन्ने अनि कतिबेला बेच्ने भन्नेमा ध्यान दिनुपर्छ । जोखिम बहन गर्न सक्ने क्षमतामा ख्याल गर्न आवश्यक छ । सेयर बजारमा आम लगानीकर्ताको मनोविज्ञानको पनि महत्वपूर्ण हुन्छ । यसबाहेक देशको आर्थिक तथा राजनीतिक अवस्था, तरलता अवस्था, ब्याजदर, कम्पनीहरुको लाभांश वितरण क्षमता, सम्बद्ध कम्पनीको प्रमुख वित्तीय सूचकहरु पनि उत्तिकै ध्यान दिन आवश्यक देखिन्छ ।

नेप्से सूचक आइतबार १२.७७ अंकले बढेर १४१०.३४ विन्दुमा आइपुगेको छ । १८४ कम्पनीको १ अर्ब १० करोड रुपैयाँभन्दा बढीको कारोबार भएको छ । २४ लाख ९८ हजार ६६२ कित्ता सेयर खरिदबिक्री भएका छन् । कुल १२ समूहको कारोबार भएकामा ३ समूह घटेका छन् भने बाँकी सबै माथि लागेका छन् । सबैभन्दा धेरै निर्जीवन बिमा समूहको सूचक २३३.२२ अंकले बढेको छ । यता, वाणिज्य बैंक समूहमा ४.८ अंकको तेजी आएको छ ।

यस दिन समृद्धि फाइनान्सको सेयर भाउ सबैभन्दा धेरै ९.७७% ले बढेको छ । नेको इन्सुरेन्स र तारागाउँ रिजेन्सी होटेलमा धेरै कमाउनेमा क्रमशः दोस्रो र तेस्रो स्थानमा रहेका छन् । यता, सबैभन्दा धेरै गुमाउनेमा पञ्चकन्या माई हाइड्रोपावरका लगानीकर्ता रहेका छन् । यसको भाउ ३.७०% ले तल झरेको हो । खदिरबिक्री रकममा नेको इन्सुरेन्स अग्रस्थानमा आइपुगेको छ । यसको १३ करोड ७२ लाख रुपैयाँभन्दा बढीको कारोबार भएको हो । खरिदबिक्रीमै दोस्रो र तेस्रो स्थानमा क्रमशः शिवम् सिमेन्ट्स र नेपाल पुनर्बिमा कम्पनी रहेका छन् ।

source-nepalipaisa.com