एमाले राष्ट्रिय महाधिवेशन १०-१३ मंसीरमा, नेपालको साथ छाडेका नेताहरू बैठकमा सहभागी

मंगलबार ललितपुरको च्यासलस्थित तुलसीलाल अमात्य स्मृति प्रतिष्ठानमा बसेको एमाले स्थायी कमिटी बैठकले मंसीरमा महाधिवेशन गर्ने निर्णय गरेको एमाले सचिव प्रदीप ज्ञवालीले बताए। स्थायी कमिटीका निर्णयबारे जानकारी दिंदै सचिव ज्ञवालीले महाधिवेशनको मिति तय गरिएको बताए।

महाधिवेशनको मिति तय भएसँगै विधान अधिवेशन पनि सरेको छ। अब एमाले विधान अधिवेशन ५ र ६ असोजमा हुने भएको छ। यसअघि २७ र २८ भदौमा गर्ने तय गरिएको थियो।

त्यसैवीच पूर्व प्रधानमन्त्री माधवकुमार नेपालको साथ छाडेका दोस्रो पुस्ताका नेताहरू नेकपा (एमाले) स्थायी कमिटी बैठकमा सहभागी भएका छन्।

उनीहरू मंगलबार ललितपुरको च्यासलस्थित तुलसीलाल अमात्य स्मृति प्रतिष्ठानमा बसेको एमाले स्थायी कमिटी बैठकमा सहभागी भएका हुन्। सर्वोच्च अदालतको फैसलाले गत २३ फागुनमा एमाले र माओवादी ब्युँतिएपछि नेपाल पक्षका नेता अध्यक्ष केपी शर्मा ओलीले बोलाएको बैठकमा सहभागी भएका थिएनन्।

नेपालले नेकपा (एकीकृत समाजवादी) पार्टी गठन गरेका छन्। एकीकृत समाजवादी पार्टीमा नगएर एकताका लागि पहल गर्दै आएका अष्टलक्ष्मी शाक्य, उपाध्यक्ष भीम रावल, उपमहासचिव घनश्याम भुसाल, सचिव योगेश भट्टराई लगायतका नेताहरू बैठकमा सहभागी भएका हुन्।