अफगानिस्तानको सत्ता तालिबानको हातमा आएको एक हप्ता नबित्दै तालिबानविरुद्ध सशस्त्र विद्रोह सुरु, ब्युँतियो ‘नर्दर्न एलायन्स’

अफगानिस्तानको सत्ता तालिबानको हातमा आएको एक हप्ता नबित्दै तालिबानविरुद्ध सशस्त्र विद्रोह सुरु भएको छ । दिनहुँ बढिरहेको तालिबानी ज्यादतीविरुद्ध २५ वर्ष पुरानो नर्दर्न एलायन्स फेरि एकजुट भएको छ । १९९६ मा तालिबानले अफगानिस्तानको सत्ता कब्जा गरेपछि नर्दर्न एलायन्सको स्थापना गरिएको थियो । यो संगठन २००१ मा अमेरिकासहितको पश्चिमी सेनाले काबुलबाट तालिबानलाई विस्थापित गर्दासम्म सक्रिय थियो ।

तालिबानले अहिलेसम्म पूरै अफगानिस्तानमा कब्जा गर्न सकेको छैन । उत्तर पूर्वी अफगानिस्तानको पंजशीर प्रान्तमा अहिलेसम्म तालिबानले कब्जा गर्न सकेको छैन र यही प्रान्तबाट तालिबानविरुद्ध विद्रोह सुरु भएको छ । पंजशीर नर्दर्न एलायन्सको आधार इलाका हो र यो संगठन यो प्रान्तमा निकै शक्तिशाली छ ।

कुनै समय ‘पंजशीरका सिंह’ भनिने अहमद शाह मसूदका छोरा अहमद मसूदले अहिले अमेरिकासँग सहयोग मागेका छन् । मसूदले वाशिङटन पोस्टलाई दिएको एक अन्तरवार्तामा आफूसँग तालिबानसँग लड्ने लडाकुको फौज भएको बताउँदै अमेरिकाले आफ्नो संगठनलाई हतियार र गोलाबारुद आपूर्ति गर्नुपर्ने बताएका छन् ।

तालिबानविरुद्ध विद्रोहमा उत्रिएका लडाकुहरुलाई पंजशीरमा प्रशिक्षण दिइँदैछ । यो क्षेत्र अहमद शाह मसूदको हो । अफगानिस्तानका अपदस्थ उपराष्ट्रपति अमरुल्लाह सालेह पनि अहिले यहीँ छन् । तालिबान विरोधी फौजहरु पंजशीरमा जम्मा भइरहेका छन् । यसमा अफगानिस्तानका वार लर्ड भनिने जनरल अब्दुल रशीद दोस्तम, अता मुहम्मद नूरका सैनिक र अहमद मसूदको फौज पनि छन् ।

यी फौजले पनि आसपासका क्षेत्रहरु कब्जा गर्दै पूरै अफगानिस्तान कब्जा गर्ने नीति लिएका छन् । तर, यी फौजसँग तालिबानसँग लड्न अत्याधुनिक हतियार छैनन् । पंजशील अफगानिस्तानको एकमात्र यस्तो क्षेत्र हो जो तालिबानको कब्जामा छैन । अफगानिस्तानका पूर्व उपराष्ट्रपति अमरुल्लाह सालेह पनि पंजशीरकै हुन् ।१९९६ मा तालिबानले सालेहका दिदीबहिनीहरुको हत्या गरिदिएका थिए ।

बुधबार पंजशीरमा नर्दर्न एलायन्सको झण्डा फहराएर तालिबानविरुद्ध विद्रोहको उद्घोष गरियो । यहाँ २००१ पछि पहिलो पटक नर्दर्न एलायन्सको झण्डा फहराइएको हो । पंजशीर यस्तो क्षेत्र हो जहाँ यसअघि सोभियत संघले पनि कब्जा गर्न सकेको थिएन । १९८० मा सोभियत संघले पंजशीरमा आक्रमण गरेको थियो तर सफल हुन सकेन ।

अहमद मसूदले अमेरिकासँग आफ्ना लडाकुहरुलाई समर्थन गर्न अपिल गरेका छन् । उनले भनेका छन् ‘म मेरा पिताको मार्गचित्रमा हिँड्न चाहन्छु जसमा अमेरिकाले सहयोग गर्न सक्छ ।’ अहमद शाह मसूद अफगानिस्तानका रक्षा मन्त्री रहिसकेका छन् । उनले नर्दर्न एलायन्सको नेतृत्व गरेका थिए । पंजशीरको जनसंख्या १ लाख ७२ हजारजति छ । पंजशीरको बनावट प्राकृतिक किल्ला जस्तै छ त्यसैले तालिबानी यहाँ आक्रमण गर्न डराउँछन् ।