स्वास्थ्य कार्यालयका कर्मचारी अख्तियारको नियन्त्रणमा

म्याग्दी, १२ साउन ।

अख्तियार दुरुपयोग अनुसन्धान आयोग पोखराको टोलीले जिल्ला स्वास्थ्य कार्यालयका निमित्त प्रमुख (जनस्वास्थ्य निरीक्षक) भीमप्रसाद आचार्य सहित चार जनालाई नियन्त्रणमा लिएको छ ।

स्वास्थ्य कार्यालयले सम्पन्न गर्नु पर्ने कार्यक्रमको कर्मचारीको मिलेमतोमा वीलभरपाई मिलाई अनियमित तरिकाले रकम बाँडफाँड गर्ने क्रममा अख्तियारको टोलीले १ लाख ३० हजार नगदरसहित जिन्सी शाखा प्रमुख रघुनाथ रेग्मी, लेखापाल हरिशंकर शर्मा र सवारी चालक भवदत्त जैसीलाई नियन्त्रणमा लिएको हो ।

असार मसान्त भित्रै ‘सम्पन्न भएका’ विभिन्न कार्यक्रमका ‘भुक्तानी गर्न’ आईतवार चेक लिएर सवारी चालक भवदत्त जैसी नेपाल वैंक वेनी शाखामा पुगेका थिए । वैंकमा अगाडी नै रहेका अख्तियारका कर्मचारीले चेक अनुसारको रकम चालक जैसीलाई दिएर पठाएको थियो । रकम चालक जैसीले कार्यालयमा पुगेर आचार्य, रेग्मी र शर्मालाई बुझाएपछि पिछा गरेका अख्तियारको टोलीले रकमसहित कर्मचारीलाई नियन्त्रणमा लिएको अख्तियार दुरुपायोग अनुसन्धान कार्यालय पोखराका सूचना अधिकारी मेघनाथ रिजालले बताए ।

विभिन्न कार्यक्रमको पेस्की फस्यौट गर्ने विषयमा कार्यालय प्रमुख र लेखा अधिकृतसँग  मतभेद भएपछि विभागीय कर्मचारीले नै अख्तियारमा उजुरी गरेका थिए । उजुरीको आधारमा आईतवार विहानै अख्तियारका १५ सदस्यीय टोलीले स्वास्थ्य कार्यालयको गतिविधी सुस्म रुपमा परिचालित भएको थियो । अख्तियार टोलीले पूर्वनियोजित रुपमा छापा मारिएकोले केमिकल सहितको रकम समाएपछि कर्मचारीको हात पानीमा चोपलिएपछि स्वास्थ्यका कर्मचारीलाई ‘रङ्गेहात’ पक्राउ गरिएको हो ।

‘हामीले कुनै सेवाग्राहीबाट पैसा लिएको होईन । कार्यलयले सम्पन्न गरेका कार्यक्रमको वीलभरपाई मिलाउने र भुक्तानी बाँकी रहेको रकम बैंकबाट ल्याउँदै गर्दा नियोजित रुपमा हामीलाई फसाईएको हो’ अख्तियारको नियन्त्रणमै रहेका कार्यालय प्रमुख भीमप्रसाद आचार्यले भने, ‘गण्डकी प्रदेशकी सामाजिक विकास मन्त्रीले स्वास्थ्य कार्यालय उद्घाटन गर्न आउँदा र अन्य कार्यक्रमको होटलमा तिर्नु पर्ने वील तिर्न यो रकम प्रयोग गर्न लागेका हौं ।’