सार्वजनिक यातायात संचालन गर्ने सरकारको निर्णय

सरकारले सार्वजनिक यातायात संचालन गर्न दिने निर्णय गरेको छ ।

असार २२ गते बसेको मन्त्रीपरिषद बैठकको निर्णय आज सार्वजनिक गर्दै सरकारका प्रवक्ता तथा अर्थमन्त्री डा. युवराज खतिवडाले यस्तो जानकारी दिएका हुन् ।

उनका अनुसार जिल्लाभित्र सार्वजनिक यातायात चल्न दिइने निर्णय भएको हो । अब जिल्लाभित्र मात्रसार्वजनिक यातायातका साधान संचालनमा आउनेछन् ।

अन्तरजिल्ला वा लामो दूरीका यातायातका साधन संचालनमा लगाइएको रोक भने यथावत छ ।

त्यसरी सार्वजनिक यातायातका साधन संचालन गर्दा स्वास्थ्यका मापदण्ड पूर्ण रुपले पालना गर्नुपर्नेछ । एक पंक्तिको एक सिटमा सामाजिक दूरी कायम हुने गरी एकजना मात्र राख्न पाइनेछ । यात्रुहरुले अनिवार्य रुपमा मास्क लगाउनुपर्नेछ भने सबै यातायातका साधनको ढोका र भित्र स्यानिटाइजरको व्यवस्था गर्नुपर्नेछ । चालक र सहचालकले मास्क, पञ्जा र भाइजर अनिवार्य लगाउनुपर्नेछ भने गाडीलाई दैनिक रुपमा निसंक्रमण गर्नुपर्नेछ ।

यातायातका साधनहरुले सिट क्षमताको आधा मात्र यात्रुहरु बोक्ने पाउनेछन् भने त्यसबाट यातायात व्यवसायीलाई पर्नजाने आर्थिक क्षतिको पूर्तिका लागि साबिकको भाडादरमा ५० प्रतिशतले बढाएर भाडा लिन सकिने समेत सरकारले निर्णय गरेको छ । तर, बढेको भाडा कोभिड १९ रहुञ्जेल मात्र लागू हुने बताइएको छ ।

सरकारले काठमाण्डौ उपत्यकाको हकमा उपत्यकाभित्र मात्र र जिल्लाको हकमा सम्बन्धित जिल्लाभित्र मात्रै संचालन गर्न पाउने गरी ट्याक्सी समेत संचालन गर्न दिने निर्णय गरेको छ । यसरी ट्याक्सी संचालन गर्दा २ जना मात्र यात्रु राख्न पाइनेछ । परिवारको हकमा २ जना बाहेक ५ वर्षमुनिका बालबालिका पनि राख्न पाइनेछ ।