नेपालमा थप एक जना कोरोना संक्रमितको मृत्यु

नेपालमा थप एक जना कोरोना संक्रमितको मृत्यु भएको छ ।
धरानस्थित वीपी कोइराला स्वास्थ्य विज्ञान प्रतिष्ठानमा मंगलबार राति ७ बजे महोत्तरीका ६० वर्षीय पुरुषको मृत्यु भएको हो । योसँगै नेपालमा कोरोना संक्रमणबाट मृत्यु हुनेको सं‌ख्या ४१ पुगेको छ ।
प्रतिष्ठानमा आउदा नै सिकिस्त अवस्थामा रहेका ती वृद्धलाई शुरुमा आइसियुमा राखेर उपचार गरिएको थियो । उनको पिसिआर जाँच गर्दा रिपोर्ट पोजेटिभ आएपछि हिजो आइसियुबाट आइसोलेसनमा स्थानान्तरण गरिएको थियो । बिरामीमा रुघाखोकी र ज्वरो आएको थियो ।
अस्पताल ल्याएको दिन उनको स्वाब परीक्षण गरिएको थियो । सोही दिन पोजिटिभ आएको अस्पतालका प्रवक्ता डा दिनेश सापकोटाले जानकारी दिनुभयो ।
‘उहाँ वीपीमा उपचारमा आउँदा नै निक्कै सिरियस हुनुहुन्थ्यो, त्यसैले आइसियुमा राखेर उपचार भएको थियो,’ प्रवक्ता डा सापकोटाले भन्नुभयो, ‘पोजेटिभ देखिएपछि आइसोलेसनमा राखेका थियौं, निधन भयो ।’