एमालेमा विभाजन रोक्ने अन्तिम कसरत !

सत्तारुढ दल नेकपा एमालेलाई बिभाजनबाट बचाउने अनेक प्रयास भएका छन् । विहिबार दिनभर विभिन्न नेताहरुले भेटवार्तालाई निरन्तरता दिदै एकता बचाउने प्रयास गरेका छन् । विहान एमालेको स्थायी कमिटीको बैठकबाट शुरु भएको छलफल दोस्रो तहका नेताहरुको भेटवार्ता हुदै नेता माधवकुमार नेपाल र राष्ट्रपति विद्यादेवी भण्डारीसँगको भेटवार्तामा गएर टुंगिएको थियो ।

एमालेको अध्यक्ष एवं प्रधानमन्त्री केपी शर्मा ओली पक्षलाई अहिले सबैभन्दा अप्ठ्यारो राष्ट्रिय सभाको उपनिर्वाचनमा नेपाल पक्षले नेपाली काँग्रेस र माओवादी केन्द्रसँग गठबन्धन बनाएपछि परेको छ ।

ओली पक्षले गृहमन्त्री रामबहादुर थापालाई उम्मेदवार बनाउने बताए पनि उनी निर्वाचनमा पराजित हुने अवस्थामा उम्मेदवार नबन्ने भएका छन् । नेपाल पक्षले काँग्रेस र माओवादीसँग उपनिर्वाचनमा गठबन्धन बनाएसँगै ओली पक्षमा हलचल मच्चिएको छ । भर्खरै एमालेमा प्रवेश गरेका थापालाई पराजित गरेर ओली पक्षलाई कमजोर बनाउने नेपाल पक्ष र माओवादी केन्द्रको रणनीतिमा नेपाली काँग्रेसले साथ दिएपछि ओली पक्ष दबाबमा आएको हो ।

त्यस्तै आगामी सोमबार प्रधानमन्त्री ओलीले विश्वासको मत लिने तयारी गरि रहदा उनले विश्वासको मत पाउने आधारहरु कमजोर बन्दै गएका छन् । एकातिर जसपा यसै कारणले विभाजनको संघारमा पुगेको छ भने जसपाका आधा सांसदले मत दिए पनि नेपाल पक्ष भने ओलीले पार्टीमा सहमति नगरे फ्लोर क्रस या राजीनामा गरेर भएपनि ओलीलाई पराजित गर्ने स्पष्ट रणनितिमा अगाडी बढेको छ । नेता नेपालले ओलीसहित उनी पक्षलाई यो सन्देश स्पष्ट रुपमा दिएपछि ओली पक्ष दबाबमा आएको हो । यहि दबाबको शृंखला अन्तर्गत ओलीले राष्ट्रपति भण्डारीलाई प्रयोग गरेर नेता नेपाललाई मनाउने कोशिश गरेको नेपाल पक्षका नेताहरुले बताएका छन् । यस अघि पछिल्ला दुई दिनमा प्रधानमन्त्री ओलीले पनि पटक पटक राष्ट्रपति भण्डारीसँग भेटवार्ता गरेका छन् ।

विहिबार राति २ घण्टा भन्दा बढी राष्ट्रपति निवासमा बिताएका नेपालले ओलीलाई विश्वासको मत दिने र राष्ट्रिय सभा उप निर्वाचनमा साझा उम्मेदवार बनाउने आफ्नो बटमलाइन २०७५ जेठ २ कै अवस्थामा पार्टी फर्किनुपर्ने नै बताएका छन् । जुन उनले यस अघि पटक पटक भन्दै आएका छन् ।

विहिबार राष्ट्रपति भण्डारीलाई भेट्नु अघि नेता नेपालले काँग्रेस सभापति शेरबहादुर देउवालाई पनि भेटेका छन् । देउवासँग नेता नेपालले ओलीको विकल्पमा सरकार बनाउने विषयमै छलफल भएको छ । यसका लागि नेपाल पक्षका सांसदहरुले राजीनामा गर्नु परेमा पनि गरेर अगाडी बढ्ने रणनिति बनाइएको छ ।

त्यस्तै विहिबार एमालेका दोस्रो तहका नेताहरु पनि ओली र नेपाललाई मिलाउन सक्रिय भएको देखियो । उपप्रधानमन्त्री इश्वर पोखरेल र नेपाल पक्षका युवा नेता योगेश भट्टराईबीच बुधबार सिंहदरबारमै भेटवार्ता भयो । त्यस्तै अर्थमन्त्री विष्णु पौडेलले सुरेन्द्र पाण्डे, गोकर्ण विष्ट र योगेश भट्टराईसँग भेट गरेका थिए । यी साबि भेटमा पार्टीलाई एक बनाउने विषयमा छलफल भएको थियो ।

यी सबै भेटका बाबजुत अब प्रधानमन्त्री ओली कसरी अगाडी बढ्न चाहन्छन भन्नेमै एमालेको विभाजन रोकिने या नरोकिने भन्ने देखिएको छ । नेपाल पक्षको २०७५ जेठ २ मा फर्किनुपर्ने अडानका बीच ओली धेरै अगाडी बढिसकेका छन् । उनलाई पछाडी फर्किएर ‘कमप्रमाइज’ गर्न सजिलो देखिदैन ।

विहिबारको स्थायी कमिटी बैठकमा पनि राष्ट्रिय सभा उप निर्वाचनमा नेपाल पक्षले साथ नदिएमा जित्न नसकिने निष्कर्ष ओली पक्षले निकालेको छ । बैठकमा शंकर पोखरेल र प्रदीप ज्ञवाली लगायतका नेताहरुले अहिलेको अवस्थामा राष्ट्रिय सभाको उपनिर्वाचन जित्न गाह्रो हुने विचार राखेका थिए । चुनाव नजित्ने भएमा रामबहादुर थापाको विकल्प खोज्ने चर्चा भएपनि निर्णय भने भइसकेको छैन ।

अब अहिले एमालेमा प्रधानमन्त्री ओली र नेता नेपाललाई अन्तिम पटक फेरी वार्तामा बसाल्ने प्रयास भएको छ । यस अघि बैशाख ८ र ९ गते भएको ओली र नेपालको वार्ता असफल भएको थियो । विश्वासको मत लिने दिन नजिकै आउदै गर्दा एमालेमा एक हुनेकी विभाजन हुने भन्ने विषयमा व्यापक अन्तरसंघर्ष जारी रहेको देखिएको छ ।