लागुऔषध डाईजापाम, फेनोगान र नुर्फिन सहित भरिया पक्राउ

सुनौली नाका हुँदै सदरमुकाम बेनी भित्राईएको डाईजापाम, फेनोरागन र नुर्फिन लागुऔषध सहित एक सेवनकर्ता/भरियालाई प्रहरीले पक्राउ गरेको छ ।
प्रहरीले डेरामा लुकाई राखेको ९९ एम्पुल डाईजापाम इन्जेक्सन, फेनोगान इन्जेक्सन ९९ एम्पुल र नुर्फिन ९९ एम्पुलसहित रघुगंगा गाउँपालिका, ६ कोटगाउँ घर भै बेनी नगरपालिका, ७ मंगलाघाट डेरागरी वस्ने २१ बर्षिय साजन शेरपुञ्जा पुनलाई पक्राउ गरेको हो । प्रहरीले शेरपुञ्जाको डेराबाट लागुऔषधसँग टोसिवा ल्यापटप पनि बरामद गरेको छ ।
प्रहरीले लागुऔषध सेवनकर्ता समेत रहेका भरिया शुरपुञ्जालाई सोमबार साँझ डेराबाट पक्राउ गरी मंगलवार जिल्ला अदालतबाट ५ दिनको म्याद थपगरी अनुसान्धान सुरु गरेको जनाएको छ ।
‘सानो सहरमा बरामद लागुऔषधको परिणाम ठूलो हो । भैरहवा रुटबाट लागुऔषध ल्याउने गरेको तथ्य खुलेको छ’ जिल्ला प्रहरी कार्यालयका प्रमुख श्याम राईले भने, ‘पक्राउ परेका युवा लागुऔषध भरिया हुन । लागुऔषध कारोवारीले बेनीलाई ट्रान्जिटपोईन्ट बनाई कारोवार गर्ने गरेको देखिन्छ ।’
प्रहरीको अभिलेख अनुसार यस अघि ०७३ बैशाख, ०७४ फागुन, ०७५ पुस, ०७६ असार १ गते डाईजापाम, फेनेरागन, नुर्फिन तथा सिरिन्ज करिव उत्तिकै मात्रामा बरामद सहित भरिया/सेवनकर्ता पक्राउ गरेको थियो ।
सदरमुकाम बेनीसमेत लागुऔषध प्रयोगकर्ता किसोर–किसोरीको संख्या बढेको प्रहरीले दावी गरेको छ । जिल्लामा लागुऔषध सेवनकर्ता बढ्दै गएका छन । सदरमुकामसमेत सहरी क्षेत्रमा ब्राउनसुगर, इन्जेक्सनबाट लागुऔषध सेवनकर्ता बढी छन । सहरी क्षेत्रमा मात्र होईन जिल्लाका अधिकांश ग्रामिण क्षेत्रका विद्यालय तहमा समेत चरेस र गाँजा जस्ता नसालु पदार्थ सेवन गर्ने बढेका छन । विद्यालय तहको कलिलो उमेरमा मदिरा सेवन गर्नु त समान्य जस्तै भएको छ । केही दिन अघि पनि प्रहरीले २४ केजीबढी प्रशोधित गाँजा बरामद सहित कारोवारी पक्राउ गरेको थियो ।
आफु विरामी भएको बाहानामा बाबुआमालाई लागुपदार्थको रुपमा प्रयोग हुने औषधीको किन्न पसलमा पठाउने र खरिद गर्ने गरेको समेत भेटिएको प्रहरीले जनाएको छ । निरक्षर बाजेबजै वा बाबुआमा अज्ञानताबस छोराछोरीको हातमा घरमै लागुपदार्थ पुग्ने गरेको प्रहरीले दावी गरेको छ ।
प्रहरीका अनुसार स्कुले उमेरका किसोरकिसोरीले लागुपदार्थको रुपमा प्रयोग गर्ने औषधी किन्न बृद्धी तथा अनपढ आमाबाबुलाई प्रयोग गर्ने गरेका छन । डाक्टरको प्रिस्क्रिप्सन र विरामीको अभिलेख विना प्रयोग गर्न नपाईने डाईजीपाम, क्लोनाजीपाम, अल्प्राजोलाम जस्ता औषधी गिरोहहरुले विद्यालय, क्याम्पसका विद्यार्थीसम्म पुर्‍याएका छन ।