प्रेमिका हत्या ः प्रेमीलाई सर्वस्वसहित ३० बर्ष कैद

जिल्ला अदालतले बेनी नगरपालिका, ९ काउलेगौडाका रवि (इन्द्रबहादुर) खड्काले गर्भवती प्रमिकालाई गाडी सहित नदीमा खसाली हत्या गरेको ठहर गर्दै सर्वस्वसहित ३० बर्ष कैद र १ लाख जरिवाना गर्ने फैसला गरेको छ ।

जिल्ला न्यायाधिश राजकुमार कोईरालाको इजलासले बुधवार मुलुकी ऐनको ज्यानसम्बन्धी महलको १३.३ अनुसार कतब्र्य ज्यानमा सर्वस्वसहित २० बर्ष, अपहरण तथा शरीर बन्धक बनाएकोमा ८ बर्ष, महिलालाई अपहरण गरेकोमा थप दुई बर्ष गरी ३० बर्ष कैद, एक लाख जरिवाना र अपहरणको दैनिक ५ सयका दरले क्षतिपूर्ति भराउने फैसला भएको जिल्ला अदालतका सूचना अधिकारी समेत रहेका श्रेष्तेदार खिलप्रसाद वुर्लाकोटीले ले बताए ।

दलित समुदायकी प्रेमिकालाई बोलेरो जीपसहित कालीगण्डकी नदीमा खसाल्नु अघि प्रेमी रवि खड्काले बेनी–पोखरा चल्ने ग १ ज ६८११ नम्बरको जीपका चालक यामबहादुर रोकासँग गरेको टेलिफोन कुराकानीको सम्बाद पुनहिल डट कमललाई प्राप्त भएको छ । सम्बाद यस्तो छ, सुन्नुहोस् ।

०७५ असार १४ गते दिउँसो २ बजे अन्नपूर्ण गाउँपालिका, ७ घराम्दीबाट २० बर्षिया गर्भवती प्रेमिका सविता नेपालीलाई उनकै घरबाट लु २ च २४५४ नम्बरको बोलेरो जीपमा राखी रघुगंगा गापा, १ तिप्ल्याङ नजिकै बेनी–जोमसोम सडकबाट जीप सहित कालीगण्डकी नदीमा फालेर हत्या गरेको ठहर गरेको हो ।

असार १४ गते घराम्दी आमा समुहको रोहोवरमा केटा र केटी दुवै जनाले आफुहरु विच प्रेम सम्बन्ध रहेको र सविता ६ महिनाकी गर्भवती भएको स्वीकार गरी खड्काले गाउ“लेकै विचबाट सवितालाई गाडीमा राखी घर तर्फ हिँडेका थिए ।

‘विभिन्न क्षेत्रको चर्को दवावका विच एउटा जघन्य अपराधको असुन्धान सफल ठहर भएको छ’ जिल्ला अदालतको फैसलापछि जिल्ला प्रहरी प्रमुख वीरबहादुर बुढाले भने, ‘प्रतिवादीलाई मुक्त गराउन र कम सँजाय गराउन विभिन्न पक्षबाट अनुसन्धान क्रममा दवाव सहेका थियौं । फैसला पीडितको पक्षमा आएको छ ।’

दलित प्रेमिकालाई जीपसहित कालीगण्डकी नदीमा फालेपछि वेपत्ता भएका खड्का एक सातापछि प्रहरी समक्ष आत्मसमर्पण गरेका थिए । ०७४ माघ १–७ गते बेनीमा लागेको म्याग्दी बहोत्सव क्रममा चिनजान भै युवतिको कोठमा यौनसम्पर्कपछि गर्भ रहेको साविति बयान गरेका छन । तीन सन्तानका बाबु रहेका खड्काले दलित युवतीलाई श्रीमति बनाउनु भन्दा मार्नु उत्तम ठानी गाडीसहित कालीगण्डकीमा फालेर हत्या गरेको जाहेरीमा उल्लेख छ । जिल्ला अदालतमा प्रतिवादी खड्काले गरेको वयानको एक अंश ः

‘सवितासँग सारिरिक सम्बन्ध रही गर्भ रहेको हो । सो दिनमा गाउँलेले जिम्मा लगाएपछि केटी लिएर हिँडेको हो । बाटोमा हिँड्दा हिँड्दै तीन छोराछोरी छन । जात मिल्दैन जस्ता मनमा अव के गर्ने, कसो गर्ने भन्ने अनेक कुरा खेल्दा दिमाखले राम्रो काम गरेन…..गाडी खोलामा खस्यो । म बाहिर निक्लें, सविता र गाडीलाई कालीगण्डकीले बगायो ।’