उद्योग वाणिज्य महासंघको वरिष्ठ उपाध्यक्षमा चन्द्र ढकालको उम्मेदवारी

उद्यमी चन्द्रप्रसाद ढकालले नेपाल उद्योग वाणिज्य महासंघको आसन्न निर्वाचनमा वरिष्ठ उपाध्यक्षमा उम्मेदवारी दिने औपचारिक घोषणा गरेका छन् ।
यसअघि गृहजिल्ला बागलुङबाट उम्मेदवारी दिने उद्घोष गरेका उनले काठमाडौंमा बुधबार आयोजित एक कार्यक्रममा आगामी चैतमा हुने महासंघको वार्षिक साधारणसभामा वरिष्ठ उपाध्यक्षमा उम्मेदवारी दिने घोषणा गरेका हुन् । ढकाल हाल महासंघमा उपाध्यक्ष छन् ।
अब महासंघको वरिष्ठ उपाध्यक्षमा ढकाल र किशोरकुमार प्रधानबीच प्रतिस्पर्धा हुनेछ । प्रधानले गृहनगर विराटनगरमा कार्यक्रम गरी यसअघि नै उम्मेदवारी घोषणा गरिसकेका छन् । महासंघको वरिष्ठ उपाध्यक्ष अर्को कार्यकालमा स्वतः अध्यक्ष हुने वैधानिक व्यवस्था छ । त्यसैले महासंघको राजनीतिमा पछिल्लो समय वरिष्ठ उपाध्यक्ष पदमै प्रतिस्पर्धा हुन थालेको हो ।
को हुन् ढकाल ?
बागलुङको अमलाचौरमा २०२२ सालमा जन्मेका ढकाल हाल नेपाल उद्योग वाणिज्य महासंघको उपाध्यक्ष तथा रोजगारदाता परिषद्को सभापति छन् । उनी महासंघमा यसअघि दुई कार्यकाल कार्यसमितिको सदस्य थिए ।
उनी आइएमई गु्रप, ग्लोबल आइएमई बैंक र चन्द्रागिरि हिल्स लिमिटेडका अध्यक्ष तथा डिस होम मिडिया प्रालिका प्रवर्द्धक हुन् ।
कार्गो व्यवसायबाट व्यावसायिक यात्रा सुरु गरेका ढकालको जलविद्युत्, पर्यटन, सूचना प्रविधि, ट्राभल्स एन्ड टुर्स, अटोमोबाइल तथा केबुलकार लगायतका दुई दर्जनभन्दा बढी व्यवसायमा लगानी रहेको छ ।
ढकाल नेपाल इन्डोनेसिया चेम्बर अफ कमर्स एन्ड इन्डस्ट्रीका अध्यक्ष तथा नेपाल जर्मन चेम्बर अफ कमर्स एन्ड इन्डस्ट्रीका उपाध्यक्ष छन् ।
समाज सेवाका विविध क्षेत्रमा संलग्न ढकाल लगानी बोर्डका आमन्त्रित सदस्य हुन् । उनी नेपालका लागि इन्डोनेसियाका अवैतनिक वाणिज्य दूत पनि हुन् ।